Bıyl respýblıka boıynsha 13 kásiporynda ereýil boldy
ASTANA. KAZINFORM – Bıyl respýblıka boıynsha 13 kásiporynda ereýil boldy. Bul týraly QR Eńbek jáne halyqty áleýmettik qorǵaý komıtetiniń tóraǵasy Tólegen Ospanqulov málimdedi.
Qyzmetkerlerdiń negizgi talaptary jalaqyny kóterý, «QazMunaıGaz» AQ enshiles táýeldi uıymdarynyń shtatyna aýystyrý, syıaqylardy tólep, eńbek jaǵdaılaryn jaqsartý, jalaqyny ındeksteý, qyzmetkerlerdi bosatý táýekelderi jáne t.b.
– Eńbek jáne halyqtyń áleýmettik qorǵaý mınıstrligi qyzmetkerlerdiń eńbek quqyqtaryn qorǵaý boıynsha turaqty negizde jumys júrgizedi. Mınıstrliktiń janyna 2021 jyldan bastap ahýaldyq ortalyq jumys isteıdi. Onyń sheńberinde el kásiporyndaryndaǵy ahýalǵa kúndelikti monıtorıng júrgiziledi. Aǵymdaǵy jyldyń basynan respýblıka boıynsha monıtorıngte 127 kásiporyn bolsa, onyń ishinde 50 kásiporynnyń problemalary sheshilip, olar monıtorıngtan alyndy. Búgingi tańda 77 kásiporyn baqylaýda. Olar boıynsha ýákiletti memlekettik organdar eńbek janjaldaryn boldyrmaý boıynsha sharalar qabyldaýda, - deıdi Tólegen Ospanqulov.
Salalyq bóliniste janjaldardyń negizgi úlesi – munaı-gaz taý-ken, metallýrgııa jáne kommýnaldyq sala kásiporyndaryna tıesili. Sondaı-aq, narazylyqtardyń týyndaý sebepteriniń biri – servıstik kompanııalardyń kelisimsharttarynyń qysqa merzimine baılanysty. Sol sebepti qyzmetkerler ereýilge shyǵyp talap-tilekterin aıtqan. Komıtet tóraǵasynyń sózinshe barlyq ereýilder zańsyz dep tanylǵan.
– Aıta ketý kerek, barlyq ereýilder QR eńbek kodeksinde belgilengen qyzmetkerlerdiń talaptaryn usyný rásimderin saqtamaı, stıhııalyq tártippen ótti. Osyǵan baılanysty 5 sottyń sheshimimen ereýilder zańsyz dep tanyldy. Aǵymdaǵy jylda memlekettik eńbek ınspektorlary 126 kásiporynda 1,5 mln teńgeden astam sommaǵa 9,7 myń qyzmetkerdiń aldyndaǵy jalaqy boıynsha bereshekti anyqtady. Qabyldanǵan sharalardyń nátıjesinde 8,1 myńnan astam qyzmetkerdiń quqyqtary qorǵalyp, olarǵa 890 mln teńge tólendi. Jumys berýshilerge 1409 uıǵarym berilip, olarǵa 107 mln teńgeden astam sommaǵa 1780 ákimshilik aıyppul salyndy. 2024-shi mamyrǵa jalaqy boıynsha bereshek 29 kásiporynda 1,6 myńnan astam qyzmetkerlerdiń aldynda 682,6 mln teńgeni qurady, - deıdi spıker.
Eske sala keteıik, buǵan deıin kásiporyndardyń tsıfrlyq kartasy jasalǵanyn habarlaǵan bolatynbyz.
Zulqarnaı Ermuratuly
