Bıyl rekordtyq kólemde turǵyn úı paıdalanýǵa beriledi – Serik Jumanǵarın

ASTANA. KAZINFORM — Bıyl elimizde 19 mln sharshy metr turǵyn úı paıdalanýǵa beriledi. Bul týraly Úkimet basshysynyń orynbasary Serik Jumanǵarın málim etti.

— Bıyl rekordtyq kólemdegi keminde 19 mln sharshy metr turǵyn úı paıdalanýǵa beriledi. Bul nátıjelerge jańa ınfraqurylymdy salýdan jáne ıpotekalyq kredıt kólemin ulǵaıtýdan bastap jalǵa beriletin turǵyn úımen qamtamasyz etýge deıingi barlyq aspektilerdi qamtıtyn bastamalar arqyly qol jetkiziledi, — dedi Serik Jumanǵarın Úkimet otyrysynda.

Vıtse-premerdiń málimdeýinshe, ekonomıkanyń naqty sektoryn qarjylandyrýdy ulǵaıtýǵa baǵyttalǵan bastamalar jalpy ishki ónimniń ulǵaıýyna alyp keledi. 

— Joǵaryda atalǵan sharalardyń ýaqtyly oryndalýyn baqylaý úshin meniń basqarýymmen Ekonomıkalyq ósý jónindegi jedel shtab quryldy jáne jumys isteıdi. Barlyq týyndaıtyn másele jedel jáne dereý sheshiledi, — deıdi ol.

Aıta ketsek, elimizde 2025 jyldyń qańtarynda paıdalanýǵa berilgen jańa nysandardyń jalpy alańy 942,8 myń sharshy metr. Onyń ishinde turǵyn úıdiń jalpy alańy 2024 jyldyń qańtarymen salystyrǵanda 26,9% azaıyp, 766,1 myń sharshy metrdi qurady.