Bıyl rekordtyq 11 myń shaqyrym avtojol jóndelip jatyr
ASTANA. KAZINFORM – 2026 jyly qurylys jáne jóndeý jumystary rekordtyq 11 myń shaqyrym joldy qamtydy. Onyń ishindegi 3,4 myń shaqyrymy respýblıkalyq mańyzy bar joldar jelisin salý jáne rekonstrýktsııalaý, 5 myń shaqyrymy respýblıkalyq trassalardy kúrdeli jáne ortasha jóndeý, 2,4 myń shaqyrymy jergilikti mańyzy bar joldardy jóndeý. Bul týraly Úkimettiń baspasóz qyzmeti habarlady.
Úkimet Memleket basshysynyń 2024 jylǵy «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda qoıylǵan mindetterdi oryndaý aıasynda tranzıttik áleýetti damytýdy jalǵastyrýda. Qańtar–maýsym aılarynda kóliktiń barlyq túrimen júk tranzıtiniń jalpy kólemi 21,7 mln tonna boldy, bul 2025 jyldyń sáıkes kezeńimen salystyrǵanda 24%-ǵa artyq (17,5 mln tonna).
2026 jyly qurylys jáne jóndeý jumystary rekordtyq 11 myń shaqyrym joldy qamtydy. Onyń ishindegi 3,4 myń shaqyrymy respýblıkalyq mańyzy bar joldar jelisin salý jáne rekonstrýktsııalaý, 5 myń shaqyrymy respýblıkalyq trassalardy kúrdeli jáne ortasha jóndeý, 2,4 myń shaqyrymy jergilikti mańyzy bar joldardy jóndeý. Joldardy kútip ustaý maqsatynda aqyly jol ýchaskeleri júıesi damytylýda. Jýyrda bul tizim jalpy uzyndyǵy 1,6 myń shaqyrym bolatyn taǵy 6 jańa baǵytpen tolyqtyrylady: Qaraǵandy — Balqash, Býrylbaıtal — Kúrti, Aqtóbe — Qandyaǵash, Taldyqorǵan — Óskemen, Atyraý — Astrahan, Merke — Shý. Nátıjesinde aqyly joldarynyń jalpy uzyndyǵy 4,9 myń shaqyrymnan 6,7 myń shaqyrymǵa deıin ulǵaıady.
Qazaqstannyń avıatsııa parkinde 111 áýe kemesi bar. Bıyl bir Airbus A321 neo jáne eki Boeing 737 MAX 8 ushaǵy jetkizildi. Qazirgi ýaqytta Qazaqstan 32 memleketpen halyqaralyq áýe qatynasyn ornatqan. Jalpy sany 158 baǵyt boıynsha aptasyna 915 reıs oryndalady. 2026 jyly mynadaı ınfraqurylymdyq jobalar iske asyrylýda: Arqalyq áýejaıyn qalpyna keltirý; Zaısan, Qatonqaraǵaı jáne Kendirli áýejaılaryn salý; Shymkent áýejaıynda ekinshi ushý-qoný jolaǵyn salý; Almaty áýejaıynyń termınalyn jańǵyrtý jáne Úrjar áýejaıyn rekonstrýktsııalaý; Pavlodar áýejaıynyń ushý-qoný jolaǵyn rekonstrýktsııalaý.
Temirjol salasynda da jartyjyldyqtyń oń dınamıkasy baıqalady: qańtar–maýsym aılarynda temirjol kóligimen 157,1 mln tonna júk tasymaldandy (ótken jyldyń sáıkes kezeńimen salystyrǵanda 3,5%-ǵa kóp — 151,9 mln tonna). Memleket basshysynyń tapsyrmasy boıynsha 2029 jylǵa deıin 11 myń shaqyrym temirjoldy jóndeý josparlanǵan. Onyń ishinde 5216 shaqyrym jóndelip boldy, al bıylǵy jyldyń jospary — 1577 km.
Ótken jyldyń qorytyndysy boıynsha salada birqatar mańyzdy oqıǵalar tirkeldi:
«Dostyq — Moıynty» temirjolynyń ekinshi jelisi paıdalanýǵa berildi (836 shaqyrym);
«Qyzyljar — Moıynty» temirjol jelisiniń qurylysy bastaldy (323 shaqyrym);
«Almaty aınalma temirjol jelisi» jobasy boıynsha jumys qozǵalysy iske qosyldy (75 shaqyrym);
775 lokomotıvti (Wabtec, Alstom, CRRC) jáne 2,7 myń fıtıngtik platformany jetkizý boıynsha kelisimsharttarǵa qol qoıyldy;
El boıynsha 124 temirjol vokzalyn jańǵyrtý bastaldy;
Aqtaý teńiz portynda konteınerlik habtyń qurylysy aıaqtaldy. Sonymen qatar Quryq-Baký baǵytyna qurǵaq júk kemesi shyǵarylyp, jalpy quny 74,3 mlrd teńge bolatyn 8 jańa kemeniń qurylysy bastaldy. Olardy 2028 jyldyń sońyna deıin paıdalanýǵa berý josparlanǵan.
Avtomobıl baǵyttarynda tasymaldaý geografııasy 42 memleketpen jasalǵan kelisimderdiń arqasynda keńeıip keledi. Túrikmenstan, Iran jáne Túrkııamen ruqsattamasyz tasymaldaý júıesi engizildi. Sonymen qatar Qazaqstan Qytaı aýmaǵynyń ishki óńirlerine tranzıttik avtokólik tasymaldaryn júzege asyrý quqyǵyna ıe boldy. Elimizdiń avtomobıl joldarynda júk kólikteriniń salmaǵy men kólemi parametrlerin avtomatty túrde baqylaý úshin 83 avtomattandyrylǵan salmaq ólsheý stansasy ornatyldy. Olar adamnyń qatysýynsyz aıyppuldardy avtomatty túrde rásimdeý úshin Ákimshilik is júrgizýdiń biryńǵaı tizilimi júıesimen biriktirilgen.
Aıta ketelik Qazaqstandaǵy mańyzdy avtojol jobalary boıynsha Jol kartasy bekitildi.
