Bıyl iri kásiporyndardyń shyǵaryndylary 148 myń tonnaǵa azaıdy
ASTANA. KAZINFORM - Bıyl iri kásiporyndardyń shyǵaryndylary 148 myń tonnaǵa azaıdy. Bul týraly jyl qorytyndysyna oraı BAQ ókilderine arnalǵan brıfıngte Ekologııa jáne tabıǵı resýrstar mınıstri Erlan Nysanbaev aıtty.
- 2025 jyldyń qorytyndysy boıynsha oń nátıjege qol jetkizildi. 2022 jylmen salystyrǵanda elimizdiń iri kásiporyndary boıynsha normatıvtik shyǵaryndylar kólemi 148 myń tonnaǵa, ıaǵnı 7,2 paıyzǵa azaıdy. Emıssııalardy azaıtý eń ozyq qoljetimdi tehnologııalardy engizý arqyly keshendi ekologııalyq ruqsattarǵa kóshý esebinen júzege asyrylady. Júrgizilip jatqan reforma aıasynda 20 eń úzdik tehnık anyqtamalary bekitildi. Túrli salalardaǵy kásiporyndarǵa 11 keshendi ekologııalyq ruqsat berilip, taǵy 22 ótinim qaralýda, - dedi mınıstr.
Onyń aıtýynsha, derekterdiń ashyqtyǵy men baqylaýdy kúsheıtý baǵytynda avtomattandyrylǵan monıtorıng júıesi mańyzdy ról atqarady. Búgingi kúni kásiporyndarda ornatylǵan 78 júıeniń 74-i aýa lastanýy týraly derekterdi naqty ýaqyt rejıminde berip otyr.
Avtomattandyrylǵan júıeni ornatý talaptaryn buzǵany úshin 2024–2025 jyldary 43 kásiporyn ákimshilik jaýapkershilikke tartyldy. Salynǵan aıyppuldyń jalpy kólemi 24,3 mıllıon teńgeni qurady.
- Jalpy el boıynsha ekologııalyq baqylaý aıasynda Ekologııa departamentteri 899 tekserý júrgizip, 2 540 quqyq buzýshylyqty anyqtap, nátıjesinde 2 285 aıyppul salyndy. Salynǵan aıyppuldyń jalpy somasy 5,4 mlrd teńgeden asty, - dedi Erlan Nysanbaev.
Buǵan deıin úsh qalada qaıta óńdeýge jatpaıtyn qaldyqtardy kádege jaratý zaýyty salynatynyn jazǵan edik.