Bıyl Pavlodarda shybyn-shirkeıge qarsy 172 myń gektar alqap óńdeledi

PAVLODAR. KAZINFORM — Qansorǵysh jándikterge qarsy áýeden óńdeý sharalarynyń aıasy bıyl birden 45 myń gektarǵa ulǵaıyp otyr. Osyǵan oraı qosymsha ushaqtar men tehnıkalar tartý kózdelgen.

Ertis-Baıan óńirindegi dezınsektsııa boıynsha jumystar 2024 jyly jasalǵan úsh jyldyq kelisimsharttyń aıasynda jalǵasady. Bıylǵy jyly áýeden óńdeletin alqaptyń jalpy aýdany — 172 myń gektar. Bul ótken jylmen salystyrǵanda 45 myń gektarǵa artyq. Pavlodar qalasynyń 32 myń gektar jaıylma aýmaǵyn, Aqsý qalasynda jáne Pavlodar aýdanynda 30 myń gektardan, Tereńkól jáne Aqtoǵaı aýdandarynda 20 myń gektardan, sondaı-aq, Ertis aýdanynda 40 myń gektar jaıylma alqabyn qamtý josparlanǵan.

— Oblys ákimi Asaıyn Baıhanov áýeden óńdeletin alqaptyń kólemin ulǵaıtýdy eskere otyryp, qosymsha tehnıkany tartý qajettigin atap ótti. AN-2 markaly 8 ushaqqa verıfıkatsııadan keıin taǵy eki bort kelýi kerek. Sondaı-aq, tosqaýylmen óńdeý kezinde qoldanylatyn eki aerozoldi retteletin dıspersııa generatoryna taǵy 2 qosylady. Olardyń árqaısysynyń qamtý qashyqtyǵy — 500 metrge deıin, syıymdylyǵy — 1500 lıtrge deıin. Qoldanylatyn preparattyń kólemi proportsıonaldy túrde 14,5 myń lıtrge deıin artady. Baıer preparattarynan basqa, polıak óndirisiniń jańa jetildirilgen quraldaryn qoldaný josparlanýda. Olar naýryzdyń ekinshi onkúndiginde jetkiziledi dep kútilýde, — dep habarlady oblys ákiminiń baspasóz qyzmetinen.

Qazgıdromettiń boljamy boıynsha bıyl Pavlodarǵa kóktem erte keledi. Aýa temperatýrasy normadan 2 gradýsqa joǵary bolady dep boljanýda. Búginde Buqtyrma sý qoımasynda 38 tekshe kılometr sý bar. Bul ótken jyldyń osy kezeńimen salystyrǵanda 8,6 tekshe kılometrge artyq. Buqtyrma jáne Shúlbi sý qoımalaryna keletin sý kóleminiń boljamdy aǵyny — ortasha kópjyldyq mánderden 15 ten 40%-ǵa deıin joǵary.

Eske sala keteıik, byltyr Pavlodarda shybyn-shirkeıge qarsy ýlaý jumystary shildeniń ortasyna deıin jalǵasqan edi.