Bıyl Pavlodarda óndiristik jaraqattan 11 adam kóz jumǵan
PAVLODAR. KAZINFORM - Óndiriste zardap shekkenderdiń basym bóligi taý-ken metallýrgııa ónerkásibi kásiporyndarynda (20%) jáne aýyl sharýashylyǵynda (15%) baıqalyp otyr.
Memlekettik eńbek ınspektsııasy komıtetiniń Pavlodar oblysy boıynsha departamentiniń statıstıkalyq derekterine súıensek, 2025 jyly óńirde 104 óndiristik jazataıym oqıǵa tirkelip, 113 adam zardap shekken. Onyń ishinde 67 adam aýyr jaraqat alsa, 7 adam qaza bolǵan. Taǵy 39 adam jeńil jáne ortasha dárejedegi jaraqat alǵan.
- Bıyl alǵashqy 8 aıda 67 óndiristik jazataıym oqıǵa tirkelip, 79 adam zardap shekkeni anyqtaldy. 45 adam aýyr jaraqat alsa, 11 adam mert bolǵan. 23 adam jeńil jáne ortasha dárejedegi jaraqat alǵan. Byltyr zardap shekkenderdiń eń kóp sany taý-ken metallýrgııa ónerkásibi kásiporyndary men bıýdjettik uıymdarda anyqtalsa, bıyl bul sanatqa aýyl sharýashylyǵy qosylyp otyr, - dep habarlady Kazinform tilshisine departament basshysy Asqar Qapanov.
Jazataıym oqıǵalarǵa eńbek uıymdaryndaǵy jumystyń talapqa saı uıymdastyrylmaýy (42%), jumysshylardyń salaqtyǵy (25%), qaýipsizdik jáne eńbekti qorǵaý qaǵıdalaryn buzý (28%), eńbektiń qaýipsiz tásilderine oqytýdaǵy kemshilikter (1%), jol júrisi qaǵıdalaryn buzý (1%) sebep bolǵan.
- Óndiris oryndarynda tirkelgen jazataıym oqıǵalar kezinde adamdar bıikten qulaǵan, ne bolmasa qozǵalatyn zattardyń áserinen janshylǵan. Sondaı-aq, mashınalar men jabdyqtardy paıdalaný, jol-kólik oqıǵalary, topyraq pen konstrýktsııalardyń opyrylýy kezindegi jaraqat alyp, kúıik shalý pen ýlaný jıi tirkeledi, - dep qosty departament basshysy.
Aıtýynsha, óndiristik jazataıym oqıǵalarǵa baılanysty jumys berýshilerden óndirilgen ótemaqynyń jalpy somasy boıynsha departamentte jeke statıstıkalyq esep júrgizilmeıdi. Mundaı tólemder jumys berýshilerdiń, saqtandyrý uıymdarynyń jáne sot organdarynyń qujattary boıynsha júzege asyrylady.
Byltyr 69 qaıǵyly oqıǵa boıynsha materıaldar quqyq qorǵaý organdaryna joldanǵan. Al bıyl jyl basynan 46 oqıǵa boıynsha materıaldar quzyrly organdarǵa jóneltilgen. Qylmystyq isterdi tirkeý, olar boıynsha protsestik sheshim qabyldaý jáne kináli adamdar sanyn esepke alý quqyq qorǵaý organdarynyń quzyretine jatady.
Buǵan deıin jumysta jaraqat alǵan jaǵdaıda ótemaqyny kim tóleıtini týraly jazǵanbyz.
