Bıyl Pavlodarda 417 shaqyrym jol jóndeledi
PAVLODAR. KAZINFORM - Avtokólik joldaryn jáne kóshelerdi qaıta jańartý men jóndeýge qazynadan 25,3 mlrd teńge qarastyrylǵan.
Ertis-Baıan óńirindegi avjoldardyń jalpy uzyndyǵy - 5515 km. Onyń 1663 kılometri respýblıkalyq bolsa, 1122 kılometri oblystyq mańyzǵa ıe.
Pavlodar oblysynyń jolaýshylar kóligi jáne avtomobıl joldary basqarmasynyń málimetinshe, bıyl 417 km jergilikti jáne respýblıkalyq mańyzy bar joldar men kóshelerdi qaıta jańartý, jóndeý boıynsha 88 jobany júzege asyrý josparlanǵan.
- Onyń ishinde 96 km - respýblıkalyq mańyzy bar joldar. Aýyldyq eldi mekenderdegi kóshelerdi jóndeý boıynsha jalpy uzyndyǵy 89,9 km bolatyn 38 joba iske asady. Óńirde aýyldardyń kirme joldaryn jóndeýge mańyz berilip otyr. Sońǵy eki jylda 59 kirme jol jóndelse, taǵy 62 joldy keler jyldyń sońyna deıin aıaqtaýymyz kerek. Jalpy bıyl jergilikti avtokólik joldary jáne kóshelerdi jóndeýge 25,3 mlrd teńge bıýdjet qarajaty bólingen. Salystyrmaly túrde aıtsaq, byltyr 795 km jol qaıta jańartylyp, jóndeldi. Oǵan bıýdjet kózderinen 68 mlrd teńge jumsaldy. Qazirgi tańda bıylǵy jobalarǵa konkýrstyq rásimder júrýde, jaqyn arada merdigerlik uıymdar anyqtalady,-deıdi basqarma basshysynyń mindetin atqarýshy Narıman Omar.
Buǵan qosa respýblıkalyq mańyzy bar avtojoldardy qalpyna keltirý boıynsha jalpy uzyndyǵy 96 shaqyrymdy quraıtyn avtojoldardyń 3 ýchaskesine qarajat bólý qarastyrylǵan. Atap aıtqanda, «Atameken – Ertis – Rýsskaıa Polıana», «Qalqaman-Baıanaýyl-Úmitker-Botaqara», «Astana-Ereımentaý-Shiderti» baǵytyndaǵy avtojoldar qamtylýy kerek.
Mamannyń sózinshe, aımaq avtojoldarynda tórt kezeńnen turatyn sapany baqylaý júrgiziledi. Ulttyq jol aktıvteri sapasy ortalyǵynyń baqylaýy, avtorlyq jáne tehnıkalyq baqylaý, sondaı-aq qoǵamdyq baqylaý bar. Sapa ortalyǵynyń mamandary byltyr 629 sapar jasap, shamamen 1950 materıal úlgisin jınaǵan. Normatıvtik talaptar buzylsa, merdigerlik uıymdar kemshilikti joıýy kerek. Bolmaǵan jaǵdaıda tapsyrys berýshi merdigerdi sotqa beredi. Mysaly, byltyr sottyń sheshimi boıynsha «MKK Elıt Stroı» JShS josyqsyz merdiger dep tanylǵan.
Jalpy Ertis-Baıan óńirindegi avtojoldardyń shamamen 90 paıyzdan astamy qaǵanattarlyq deńgeıde dep baǵalanady.
Eske sala keteıik, Pavlodar oblysynda avtojoldardy tekserý nátıjesinde 200-ge jýyq aqaý tirkeldi.
