Bıyl Pavlodar óńirindegi sý aıdyndarynan 59 adam qutqarylǵan
PAVLODAR. KAZINFORM — Oblysta shomylý maýsymy aıaqtaldy. Jyl basynan óńirdegi sý aıdyndarynda 8 adam qaza tapqan, onyń ekeýi — kámeletke tolmaǵandar.
Pavlodar oblysy tótenshe jaǵdaılar departamenti bastyǵynyń orynbasary Dýman Qydyrmollaevtyń aqparynsha, ótken jazda oblys aýmaǵynda sýǵa túsýge arnalǵan 35 resmı jaǵajaı jumys istegen.
— Bıyl Baıanaýyl aýdanyna erekshe nazar aýdaryldy. Munda alǵash ret turaqty negizde jeke qutqarý bólimshesi qurylyp, oǵan 10 shtattyq birlik bólindi. Qosymsha kúsh retinde Semeı qalasyndaǵy 68303 áskerı bóliminiń áskerı qyzmetshileri tartyldy. Qutqarý ınfraqurylymyn damytý baǵytyndaǵy mańyzdy jobalardyń biri — Jasybaı kóliniń jaǵalaýynda modýldik qutqarý stantsııasynyń salynýy. Stantsııanyń sýǵa jaqyn ornalasýy jaǵalaýdaǵy jaǵdaıdy turaqty baqylaýǵa jáne tótenshe jaǵdaı kezinde áreket etý ýaqytyn qysqartýǵa múmkindik beredi, — dep atap ótti Dýman Qydyrmollaev.
Jalpy sýǵa túsý maýsymynda 59 adam qutqarylǵan. Onyń ishinde Baıanaýyldaǵy kólderde 44 adam tilsiz-jaýdyń qushaǵynan aman-esen shyǵarylǵan. Olardyń 13-i — balalar.
— Ókinishke qaraı, qaıǵyly jaǵdaılardyń aldyn alý múmkin bolmady. Shomylý kezeńinde sý aıdyndarynda 8 adam qaza tapty, onyń ishinde 2 kámeletke tolmaǵan bala bar, — dedi departament ókili.
Eske sala keteıik, Ertis ózeninde sýǵa ketken er adamnyń múrdesi alty táýlikten soń tabyldy.
