Bıyl Pavlodar óńirinde shybyn-shirkeıdi ýlaýǵa drondar jumyldyrylady

PAVLODAR. KAZINFORM - Oblysta áýeden óńdeletin alqaptardyń kólemi 172 myń gektarǵa deıin jetkiziledi. Bılik ókilderi nátıje bolmasa, merdigerge bıýdjetten bir tıyn da bermeımiz dep otyr.

Óńirlik jer qoınaýyn paıdalaný, qorshaǵan orta jáne sý resýrstary basqarmasynyń basshysy Saǵyn Tóleýtaevtyń aıtýynsha, bıyl qoldanylatyn bıologııalyq preparattardyń kólemi ótken jylmen salystyrǵanda birden 51 paıyzǵa artady. Al áýeden óńdeletin alqaptardyń kólemi 172 myń gektarǵa deıin jetkiziledi. Sondaı-aq ózen arqyly óńdeý kólemi 52 paıyzǵa ulǵaıady. Adam men tehnıka bara almaıtyn jerlerge dári shashý úshin drondar qoldaný kózdelgen. 

- Dezınsektsııalyq is-sharalar Pavlodar qalasyn jáne oblystyń alty aýdanyn qamtıtyn bolady. Atap aıtqanda, 67 eldi meken mańaıy shybyn-shirkeıge qarsy óńdeledi. Ertis ózeni men onyń arnalary boıynsha jalpy uzyndyǵy 3200 shaqyrymnan astam aýmaqty óńdeý josparlanǵan. Merdiger uıym tapsyrmalardy oryndaý úshin 200-den astam arnaıy tehnıka men qural-jabdyqty, 200-ge jýyq mamandy jumyldyrady, - deıdi basqarma basshysy.

Merdiger uıymmen úshjyldyq kelisimshartqa qol qoıylǵan. Qarjylandyrý kólemi jylyna - 4,5 mlrd teńge. Dárilengen aýmaqtardaǵy shybyn-shirkeıdiń qyrylýy kemi 80 paıyz bolýy kerek. Odan tómen bolsa, atqarylǵan jumysqa aqy tólenbeıdi degen talap qoıylyp otyr.

2025 jyly ǵalymdar Pavlodardyń keıbir aýyldarynda shybyn-shirkeıdiń ne sebepti qaptap ketkenin túsindirgen edi.