Bıyl Pavlodar óńiri myńǵa jýyq qandasty qabyldaıdy
PAVLODAR. KAZINFORM - Keıingi 9 jylda Pavlodar oblysyna 5726 qandas kóship kelgen. Olardyń barlyǵyna tıisti tólemder men kómek túrleri kórsetilgen.
Ertis boıyndaǵy eldi mekenderge bıyl 977 qandas kóship kelýi kerek. Kvotaǵa ilikkenderge qandaı kómek túrleri tıesili?
Bul suraqqa óńirlik jumyspen qamtýdy úılestirý jáne áleýmettik baǵdarlamalar basqarmasynyń basshysy Samal Qadyrova jaýap berdi.
Onyń aıtýynsha, kóship kelýshilerge memleket tarapynan kóptegen materıaldyq kómek túrleri qarastyrylǵan.
- Eń áýeli kóshýge arnalǵan sýbsıdııa - otbasynyń árbir múshesine 70 aılyq eseptik kórsetkish (AEK) mólsherinde birjolǵy tólem, odan soń turǵyn úıdi jalǵa alý jáne kommýnaldyq qyzmetterdi tóleý shyǵyndaryn óteýge arnalǵan sýbsıdııa (bir otbasyna 15-ten 30 AEK-ke deıin) tólenedi. Oǵan qosymsha ekonomıkalyq utqyrlyq sertıfıkaty (1625 AEK mólsherinde) da kóship kelýshilerge tıesili, - deıdi basqarma basshysy.
Jyl saıyn qandastar men qonys aýdarýshylardy qabyldaýdyń óńirlik kvotasyna sáıkes eldi mekender tizimi bekitiledi. Bul jerde kóship kelýshi qonystanatyn eldi mekendi ózi tańdaıtynyn eskergen jón. Qandastarymyz kóbine ol jerde týystary men tanystarynyń kóp bolýyna mańyz beredi.
Máselen byltyr oblysqa 1016 qandas kóship kelgen. Qandastardyń deni Qytaı, Túrikmenstan, Mońǵolııa, Ózbekstan, Reseı jáne t.b. memleketterden qonys aýdarǵan. Kóshi-qon organdary sońǵy jyldary Qytaıdan atamekenin izdep kelip jatqandar sany arta túskenin aıtady.
Atap óterligi, ishki kóshi-qon baǵdarlamasy boıynsha 2025 jyly óńirge 1422 adam kóship kelgen. Olar Pavlodar, Aqsý, Ekibastuz qalalaryna, sondaı-aq Jelezın, Ertis, Tereńkól, Pavlodar jáne Ýspen aýdandaryna ornalastyrylǵan.
- Іshki kóshi-qon aıasynda kelgenderdiń ishinen jumysqa qabiletti 632 adam bar, onyń ishinde 176 adam jumyspen qamtyldy (5 adam jeke kásip ashty, 23 adam memlekettik grant aldy). Jumysqa qabiletti 545 qandasymyzdyń 113-i jumys oryndaryna tursa, 11 adam memlekettik grantqa qol jetkizdi. Ózgelerin jumysqa ornalastyrý boıynsha is-sharalar qolǵa alynǵan, - dep málimdedi Samal Qadyrova.
Jalpy 2017 – 2025 jyldary oblysqa 5726 adam qonystanǵan.
Eske sala keteıik, qonys aýdarǵandarǵa beriletin turǵyn úı sertıfıkaty 7 mln teńgege jetti.