Bıyl Pavlodar oblysynyń sý aıdyndarynda 14 adam ajal qushqan
PAVLODAR. KAZINFORM - Shomylý maýsymynda Ertis boıyndaǵy sý aıdyndarynda 14 adam tilsiz jaýdyń qurbany bolǵan. Olardyń ekeýi – bala.
Ertis-Baıan óńirinde sýǵa túsý maýsymy resmı túrde jabyldy. Qutqarýshylar bıylǵy maýsymdy qorytyndylady.
- Sý aıdyndarynda jazǵy kezeńde 14 adam sýǵa ketip ajal qushty. Onyń ekeýi – bala. Adamdardyń jazataıym oqıǵaǵa ushyraýyna olardyń kóbine mas kúıinde sýǵa túsýi nemese ruqsat etilmegen jerde shomylýy sebep bolady. Sondaı-aq keıbir jandar óz kúshterin eseptemeı, tereń jerge júzip barady. Motorly qaıyqtar men katerlerdi durys paıdalanbaý da qaıǵyly jaıttarǵa soqtyryp jatady, - deıdi óńirlik tótenshe jaǵdaılar departamenti azamattyq qorǵanys basqarmasynyń bastyǵy Qydyrjan Naskenov.
Qutqarýshylar maýsym barysynda sýǵa batyp bara jatqan 14 eresek adam men 6 balany qutqaryp qalǵan.
Jalpy bıylǵy maýsymda departament ókilderi sýǵa túsý erejelerin buzýdyń 273 deregin tirkegen. Olardyń deni shomylýǵa tyıym salynǵan jerlerde bolǵan. Tekserýler nátıjesinde 58 ákimshilik aıyppul salynyp, 215 eskertý berilgen.
Eske sala keteıik, Jetisýda jaz mezgilinde 4 adam sýǵa batyp ketken, onyń ekeýi bala.