Bıyl Pavlodar oblysyndaǵy egis alqaptary 53 myń gektarǵa ulǵaıady
PAVLODAR. KAZINFORM - Óńir dıqandary egis alqaptaryna shamamen 164,5 myń tonna tuqym sebedi. Egin sharýashylyǵyn qoldaýǵa bıýdjetten 4,1 mlrd teńge sýbsıdııa qarastyrylǵan.
Ertis-Baıan óńirinde egin ósirýmen myńnan asa sharýashylyq aınalysady. Olardyń egis alańdary bıyl 1 669,7 myń gektarǵa jetedi degen jospar bar. Meje tolyq oryndalsa, ótken jylǵydan 52,9 myń gektarǵa artyq bolady degen boljam bar. Bul egis alqaptaryn ártaraptandyrý nátıjesinde múmkin bolmaqshy.
- Barlyq egis alqabynyń 974,0 myń gektary nemese 94%-y astyq daqyldary bolady. Bıyl maıly daqyldardyń egis tanaby 3%-ǵa paıyzǵa ósip, 360,9 myń gektarǵa, kartop alqaby 4%-ǵa artyp, 25,7 myń gektarǵa jetedi dep kútilip otyr. Al kókónis jáne baqsha daqyldary ótken jyldyń kóleminde – 8,8 myń gektar bolyp qala beredi. Buǵan qosa aýdandarda myqty jem-shóp bazasyn qurý jumystary júrgizilip jatyr. Osyǵan oraı bıyl jem-shóp daqyldarynyń alańyn birden 18,8 myń gektarǵa arttyrý josparlanyp, jalpy sebý aýmaǵy 300 myń gektarǵa jetkiziledi, - dep habarlady Kazinform tilshisine Pavlodar oblystyq aýyl sharýashylyǵy basqarmasy basshysynyń orynbasary Tólegen Kósherbaev.
Aldaǵy egiske 164,4 myń tonna tuqym daıyndalyp qoıǵan. Tuqym boıynsha óńirde másele joq, tipti dándi daqyldar boıynsha onyń kólemi 7,5 myń tonnaǵa kóp.
Al egin sharýashylyǵyn qoldaýǵa 2025 jyly jalpy somasy 4,1 mıllıard teńge sýbsıdııa qarastyrylǵan. Atap aıtqanda, tuqym sharýashylyǵyn qoldaýǵa - 1 mlrd teńge, mıneraldy tyńaıtqyshtar men pestıtsıdterdiń qunyn sýbsıdııalaýǵa – 2,7 mlrd teńge, fermerlerge sý jetkizý qyzmetteriniń qunyn sýbsıdııalaýǵa 300 mln teńge bólingeli otyr. Demeý qarajattyń kólemi ótken jylmen salystyrǵanda 5,4 mlrd teńgege kemigenin atap ótý kerek.
Qazir iri sharýashylyqtar qar toqtatý is-sharalaryna kirise bastaǵan. Taza súri jerde qar jamylǵysynyń bıiktigi 14 sm, al yqtyrmada 15 sm-deı bolady. Qar toqtatýdyń alǵashqy kezeńi 74,4 myń gektarda júrgizilgen.
Eske sala keteıik, bıyl Pavlodardaǵy jańa kanal iske qosylady.
Onyń nátıjesinde jylyna qosymsha 500 myń tonna aýyl sharýashylyq daqyldaryn óndirý múmkindigi bar.