Bıyl Pavlodar oblysynda 730 mlrd teńge ınvestıtsııa tartyldy

Bıyl Pavlodar oblysynda 730 mlrd teńge ınvestıtsııa tartyldy. Bul týraly Pavlodar oblysynyń ákimi Asaıyn Baıhanov aıtty, dep habarlaıdy Kazinform. 

«Barlyq negizgi áleýmettik-ekonomıkalyq kórsetkishter boıynsha oń dınamıkaǵa qol jetkizildi. Pavlodar oblysy elektr energııasynyń 42,5 paıyzyn jáne eldiń 60 paıyzǵa jýyq kómirin óndiredi. Tartylǵan ınvestıtsııa kólemi ótken jyldyń osy kezeńimen salystyrǵanda 28,2 paıyzǵa ósip, 730,1 mlrd teńge boldy. Investıtsııalardyń ósý qarqyny boıynsha bizdiń óńir respýblıka boıynsha 4-oryn alady. Bul jerde onyń 85 paıyzy jeke ınvestıtsııalar ekenin atap ótken jón. Bul 32 jobany iske asyrýǵa jáne 15 00-ge jýyq jumys ornyn qurýǵa múmkindik berdi. Jyl sońyna deıin 800-ge jýyq jańa jumys ornymen qamtamasyz etetin 291 mlrd teńgege taǵy 20 jobany iske qosýdy josparlap otyrmyz», - dedi óńir ákimi Ortalyq kommýnıkatsııalar qyzmetindegi baspasóz máslıhatynda BAQ ókilderiniń saýalyna oraı.

Onyń atap ótýinshe, strategııalyq mańyzdy jobalardyń qatarynda kelesi jyldyń birinshi jartysynda iske qosý josparlanyp otyrǵan Ekibastuz mańyndaǵy ferroqorytpa zaýytynyń qurylysy bar. Bul zaýyt Qazaqstanǵa Qytaıdan keıin ferroqorytpalardyń iri óndirýshisi bolýǵa múmkindik beredi. Jalpy, óńirlik bıliktiń jumysynda 9,7 myń jańa jumys ornyn qurýǵa múmkindik beretin 2,1 trln teńge somasyna 127 ınvestıtsııalyq joba jasaqtalǵan.

«Ókinishke qaraı, óńirimiz atmosferany lastaý boıynsha elde kóshbasshy aımaqtar qatarynda. Osy oraıda oblysta keshendi ekologııalyq sheshimderge birtindep kóshý jumystary júrgizilip jatyr. Osy jyldyń 9 aıynda bul kórsetkish 2,6 paıyzǵa nemese 13,2 myń tonnaǵa azaıdy», - dedi Asaıyn Baıhanov.