Bıyl Pavlodar oblysynda 2,67 mln tonna astyq jınalady dep boljandy
PAVLODAR. KAZINFORM — Óńirdegi egis alqaptarynyń jalpy kólemi 1 mln 445 myń gektardan asqan. Bul ótken jylǵydan 13%-ǵa kóp.
Ertis-Baıan óńiriniń dıqandary jıyn-terim jumystaryna kirise bastady. Erte pisetin aýyl sharýashylyǵy daqyldarynyń 35,6 myń gektary jınaldy. Osy aptada oblys sharýashylyqtary dándi daqyldardy, kartop pen kókónisterdi jappaı jınaýǵa kirisedi.
— Bıyl jalpy egin alqaby 1 445,4 myń gektardy quraıdy, bul ótken maýsymǵa qaraǵanda 78,7 myń gektarǵa artyq. Maıly daqyldar men kartop daqyldary boıynsha aıtarlyqtaı ósim tirkeldi. Qolaıly jaǵdaılardyń arqasynda jalpy kólemi 2,67 mln tonna shamasynda ónim jınalady dep kútilýde jáne bul byltyrǵy kórsetkishten 13%-ǵa joǵary, — dep habarlady oblys ákiminiń baspasóz qyzmetinen.
Bıyl fermerler dara daqyldy egiske táýeldilikti azaıtyp, joǵary rentabeldi jáne suranysqa ıe daqyldarǵa kóshken. Ártaraptandyrý ishki naryqty otandyq ónimmen toltyrýǵa, qaıta óńdeýdi qamtamasyz etýge jáne oblystyń azyq-túlik qaýipsizdigin nyǵaıtýǵa múmkindik beredi. Dıqandardy qoldaý úshin 6,1 mlrd teńge kóleminde sýbsıdııalar bólinip, damytý ınstıtýttary arqyly jeńildetilgen nesıeler men tehnıkalar berildi. Egin jınaý jumystaryna arzandatylǵan dızel otyny bólindi.
— Aımaqtaǵy astyq qoımalarynyń jalpy syıymdylyǵy shamamen 1,2 mln tonnany quraıdy, bul bıylǵy ónimdi tolyq kólemde saqtaýǵa múmkindik beredi. Ótken jyldardaǵydaı maýsymaralyq kezeń úshin 10 myń tonna kartop jáne 3 myń tonna sábiz saqtaý boıynsha aýyl sharýashylyǵy taýarlaryn óndirýshilermen memorandým jasalatyn bolady. Aýyl sharýashylyǵy daqyldary tuqymdarynyń qajetti kólemin qamtamasyz etý, 25 qazanǵa deıin shóp daıyndaý naýqanyn aıaqtap, jemshópti jetkizý kózdelip otyr, — dep qosty ákimdikten.
Bıyl Pavlodardaǵy qarbyz alqaptary 2 myń gektarǵa jýyqtaǵany týraly jazǵanbyz.
Al jergilikti ǵalymdar Ertis boıynyń topyraǵy tozyp bara jatqanyn aıtyp dabyl qaǵyp otyr.