Bıyl Pavlodar oblysyna 3505 adam kóship keledi
PAVLODAR. KAZINFORM - Syrttan keletin qandastarǵa 902 kvota bólinip otyr. Óńirde medıtsına, bilim berý, aýyl sharýashylyǵy jáne mádenıet salalary boıynsha mamandar tapshylyǵy baıqalady.
2024 jyly Pavlodar oblysyna syrttan keletin qandastar men qonys aýdarýshylardy qabyldaýǵa 3505 adamǵa kvota bólinip otyr. Onyń ishinde qandastarǵa - 902, ishki qonys aýdarýshylarǵa - 2603 kvota bólingen.
«Kóship kelýshilerdi oblystyń barlyq qalalary men aýdandarynda (3 qala, 10 aýdan) ornalastyrý josparlanyp otyr. Pavlodar oblysyna medıtsına, bilim berý, aýyl sharýashylyǵy jáne mádenıet salalary boıynsha mamandar qajet. Muny kóshi-qon barysynda eskeretin bolamyz. Qonys aýdarýshylardy yntalandyrý maqsatynda 2023 jyldan bastap turǵyn úı satyp alý úshin baspana qunynyń 50%-yn quraıtyn, biraq 4 mln teńgeden aspaıtyn mólsherde qarjylyq kómekke quqyǵy bar ekonomıkalyq utqyrlyq sertıfıkaty engizildi. Jyl qorytyndysy boıynsha Pavlodar oblysynda 542 otbasyǵa turǵyn úı satyp alý úshin ekonomıkalyq utqyrlyq sertıfıkattary tólendi», dep atap kórsetti Pavlodar oblysynyń jumyspen qamtýdy úılestirý jáne áleýmettik baǵdarlamalar basqarmasynyń basshysy Almıra Dısıýpova Kazinform agenttiginiń tilshisine bergen jaýabynda.
Atap óteıik, 2023 jyly oblys 3343 adamǵa kvota bólgen. Onyń ishinde 972 adam qandastar, 2371 adam ishki qonys aýdarýshylar. Óńirlik kvota 100% oryndaldy.
