Bıyl Pavlodar kolledjderine 6 myńnan astam grant bólindi
PAVLODAR. KAZINFORM - Qazirgi ýaqytta Ertis-Baıan óńiriniń 42 kolledjinde qujat qabyldaý naýqany qyzý júrip jatyr. Talapkerler 71 túrli mamandyq boıynsha tańdaý jasap, tegin bilim ala alady.
Oblystyq bilim berý basqarmasynyń tehnıkalyq jáne kásiptik bilim berý bóliminiń basshysy Qarlyǵash Asaıymovanyń aıtýynsha, bıyl óńir kolledjerine 6250 grant bólingen. 2023 jyly mundaı granttar sany 5705 bolsa, byltyr 6200 grant úlestirilgen.
- Mektep túlekteri 71 túrli mamandyq boıynsha tańdaý jasap, tegin bilim ala alady. Olardyń basym bóligi suranysqa ıe jumysshy mamandyqtar ekenin atap ótken jón. Qazirgi ýaqytta 22 kolledj áleýmettik seriktestermen birlesip 48 jańa mamandyq boıynsha bilim berý baǵdarlamalaryn ázirledi. Atap aıtar bolsaq, «Tótenshe jaǵdaılarda qorǵaý», «Jańartylatyn energetıka», «Jyljymaıtyn múlikti basqarý», «Naýbaıhana, makaron jáne kondıterlik óndiris», «Paıdaly qazbalardy baıytý», basqa da mamandyqtar bar, - deıdi ol.
Memleket basshysynyń tapsyrmasy boıynsha mindetti jumyspen qamtylǵan kásiporyndardyń ótinimderi negizinde kadrlardy maqsatty daıarlaý júıesi engizildi. Sol boıynsha búginde arnaıy tapsyrys aıasynda aımaq kolledjderinde 1770 jas oqysa, aldaǵy jańa oqý jylynda bul kórsetkishti 2500 stýdentke deıin arttyrý josparlanýda.
Tegin oqýǵa túskisi keletin 9-synyp túlekteri 18 tamyzǵa deıin, al 11-synyp bitirgender 20 tamyzǵa deıin qujattaryn tapsyrýy qajet. Kolledj stýdentterine aı saıyn 41 myń teńge shákirtaqy tólenedi. Aýyl-aýdandardan keletinderge tegin jataqhana beriledi. Jumysshy mamandyqtary men áleýmettik osal toptardyń stýdentteri tegin tamaqpen qamtylady. Sondaı-aq, jol júrý aqysy úshin 4 aılyq eseptik kórsetkish kóleminde (15 728 teńge) ótemaqy tólenedi.
Eske sala keteıik, Jumysshy mamandyqtar jylyna oraı kolledj baǵdarlamalary jańaryp jatyr.