Bıyl Ózbekstannyń ishki jalpy ónim kólemi 180 mlrd dollardan asady — Mırzıeev
TAShKENT. KAZINFORM — Bıyl Ózbekstan ekonomıkasynyń kólemi 180 mlrd dollardan asady dep kútiledi. Bul týraly V Tashkent halyqaralyq ınvestıtsııalyq forýmynda sóz sóılegen kórshiles eldiń prezıdenti Shavkat Mırzıeev aıtty, dep habarlaıdy Kazinform agenttiginiń Tashkenttegi menshikti tilshisi.
Shavkat Mırzıeev atap ótkendeı, Ózbekstanda ınvestıtsııalyq ahýaldy jaqsartý baǵytynda júıeli jumys atqarylyp jatyr. Byltyr respýblıkanyń ishki jalpy ónimi 7,7%-ǵa ósip, ekonomıkaǵa 43 mlrd dollar kóleminde ınvestıtsııa tartyldy. Sondaı-aq, memlekettiń halyqaralyq rezervteri 70 mlrd dollardan asty.
— Kópshiliktiń esinde bolsa kerek, osydan tórt jyl buryn ótken alǵashqy forýmda biz 2026 jyldyń sońyna qaraı Ózbekstannyń ishki jalpy ónimin 100 mlrd dollarǵa jetkizýdi maqsat etken edik. Al qazir qarqyndy damyp kele jatqan ekonomıkamyzdyń kólemi bıyl 180 mlrd dollardan asady dep kútiledi, — dedi Ózbekstan basshysy.
Toqtala keteıik, bul kúnderi Ózbekstan astanasynda V Tashkent halyqaralyq ınvestıtsııalyq forýmy ótip jatyr. Aýqymdy is-sharaǵa Premer-mınıstr Oljas Bektenov qatysyp otyr.
Buǵan deıin habarlaǵanymyzdaı, prezıdent Shavkat Mırzıeev bıyl Ózbekstan ekonomıkasynyń ósimi 8%-dan joǵary bolatynyn málimdegen edi.
