Bıyl Ózbekstanda birqatar qazaq jazýshycynyń mereıtoıy atalyp ótedi
TAShKENT. KAZINFORM – Bıyl Ózbekstanda qazaq jazýshylarynyń mereıtoıyn atap ótý josparlanyp otyr. Bul týraly Ózbekstandaǵy Qazaq ádebıeti keńesiniń otyrysynda aıtyldy. Bul týraly Kazinform agenttiginiń Tashkenttegi menshikti tilshisi Álıhan Asqar habarlady.
Jıyn barysynda ádebıet janashyrlary byltyr jaryq kórgen Ózbekstandaǵy qazaq qalamgerleriniń eńbekterine toqtaldy. Ótken jyly jazýshy, qazaq-ózbek ádebıetiniń zertteýshisi Qaldybek Seıdanovtyń «Kóńildegi kórikti oılar» kitaby, aqyn Muqan Rahmanulynyń «Júregim jyr tolǵaıdy» atty jyr jınaǵy baspadan shyqqan.
«2023 jyly Ózbekstandaǵy qazaq qalamgerleriniń, atap aıtqanda Qaldybek Seıdanovtyń, Lala Júnisqyzynyń, Aqshagúl Tólegenovanyń óleńderi ózbek tiline aýdarylyp, «Ózbekstan – Otanym meniń» jyr jınaǵyna endi. Munyń barlyǵy atqarylǵan úlken jumystardyń nátıjesi», - dedi Nızamı atyndaǵy Tashkent memlekettik pedogogıkalyq ýnıversıtetiniń professory Anargúl Qaldybekova.
Sonymen qatar ótken jyly Ózbekstan Jazýshylar odaǵynyń múshesi Abdýlla Rústemovtiń «Ҳaet - mýallım» (Ómir – ustaz) kitaby jaryq kórgen. Buǵan qosa onyń aýdarmasymen QR Ulttyq ǵylym akademııasynyń akademıgi, tarıhshy Erlan Sydyqovtyń «Shákárim» atty monografııalyq týyndysy ózbektildi oqyrmanǵa usynyldy. Al aqyn, aýdarmashy Saparbek Imanbekov Ózbekstannyń halyq aqyny Abdýlla Arıpovtyń «Alǵashqy mahabbatym» óleńder jınaǵyn qazaq tiline aýdardy.
Ózbekstandaǵy Qazaq ádebıeti keńesiniń ókilderi bıyl Ózbekstanda Júsipbek Aımaýytovtyń 135 jyldyǵy, Beıimbet Maılın, Sáken Seıfýllın jáne Іlııas Jansúgirovtiń 130 jyldyǵy, Berdibek Soqpaqbaev pen Ábdijamal Nurpeıisovtiń 100 jyldyq mereıtoıy atalyp ótetinin málim etti. Onyń barysynda dóńgelek ústelder, ǵylymı-praktıkalyq konferentsııalar men ádebı-mádenı is-sharalar uıymdastyrylady.
Birneshe ádebı eńbektiń avtory, jazýshy Ahan Táshmetovtiń aıtýynsha, Ózbekstandaǵy qazaq qalamgerleriniń qatary jyl saıyn tolyǵyp keledi.
«Ózbekstandaǵy qazaq ádebıetine kórsetilip jatqan qoldaý erekshe. Keıingi jyldary memleketaralyq baılanystar qarqyndy damyp, Ózbekstan men Qazaqstan arasyndaǵy mádenı, rýhanı qarym-qatynas nyǵaıa tústi. Sodan bolsa kerek, qazir Ózbekstanda qazaq qalamgerleriniń qatary artyp keledi. Taıaýda ǵana aramyzdaǵy úsh azamat Ózbekstannyń Jazýshylar odaǵyna múshe atandy. Mundaǵy qazaq qalamgerleriniń ózindik stıli bar, ortaq ádebıetke qosar úlesi mol», - dep túıindedi Ahan Táshmetov.
