Bıyl Ózbekstanda 200 myń azamat shetelge jumysqa jiberilýi múmkin

TAShKENT. KAZINFORM – Ózbekstan Aqparat jáne buqaralyq kommýnıkatsııalar agenttiginde ótken baspasóz máslıhatynda Mınıstrler kabıneti janyndaǵy Kóshi-qon agenttigi basshylary málimetinshe, tek 2024 jyldyń ózinde 161 800 azamat shetelge jumysqa jiberilgen, dep habarlaıdy Kazinform agenttigi ÓzA-ǵa silteme jasap.

Álemde shamamen 300 mıllıon halyqaralyq mıgrant bar. Bul – álem halqynyń 3,6%-y. Málimetterge sáıkes, halyqaralyq mıgranttardyń 48 paıyzy — áıelder, 38 mıllıonǵa jýyǵy — balalar, 4,4 mıllıony — stýdentter, 164 mıllıony — eńbek mıgranttary. Olardyń 75 paıyzy eńbekke jaramdy jastaǵy (20-64 jas) adamdar.

Mamandardyń aıtýynsha, shetelge jumysqa jiberýdiń bes negizgi kezeńi bar, olar birinshi kezekte áleýetti jumys berýshilerdi tabý, shetelde jumys istegisi keletin úmitkerlerdi anyqtaý jáne konkýrstar ótkizý, til men mamandyq boıynsha maqsatty oqytý, ketý aldyndaǵy qujattardy daıyndaý, quqyqtaryn qorǵaý bolyp tabylady.

Bıyl Eýropa, Azııa jáne Tynyq muhıty elderi, arab elderi, TMD elderi jáne Soltústik Amerıka aımaqtary sııaqty shet elderde 200 myń azamatqa jumysqa ornalasýǵa kómektesý josparlanyp otyr. Onyń ishinde 40 myń azamat aǵylshyn, nemis, koreı, japon jáne orys tilderi sııaqty shet tilderin meńgeredi. 60 myń azamat medıtsına, kólik júrgizý, dánekerleýshi, qurylys jáne avtomehanık sııaqty mamandyqtarǵa oqytylady.

Tańdap alynǵan úmitkerlerge jumys ornynyń talaptary, etıka jáne ishki tártip erejelerin saqtaý qajettiligi, shet memleketterdiń tili, mádenıeti jáne zańnamasy týraly túsinik beriledi.

Eske sala keteıik, ózbekstandyq fýtbolshy Hýsanov Manchester-Sıtıde oınaýy múmkindigi jaıly jazǵan edik.