Bıyl Ózbekstan «jasyl» energııa kózderiniń úlesin 26%-ǵa jetkizbek

TAShKENT. KAZINFORM – Ózbekstan prezıdenti Shavkat Mırzıeev «Qorshaǵan ortany qorǵaý jáne «jasyl» ekonomıka jyly» memlekettik baǵdarlamasyn iske asyrý boıynsha keńes ótkizdi, dep habarlaıdy Kazinform agenttiginiń menshikti tilshisi.

Keıingi jyldary Ózbekstanda «jasyl» energııa kózderiniń úlesi 16%-ǵa jetti. Bıyl bul kórsetkishti 26%-ǵa deıin arttyrý josparlanyp otyr. Ol úshin 16 kún jáne jel elektr stantsııasy, 5 gıdroelektrostantsııa men qýaty 1,8 GVt bolatyn energııa saqtaý oratalyǵy salynady.

«Jasyl» tehnologııany engizýdi yntalandyrý maqsatynda ústimizdegi jyly memlekettik kásiporyndar men úılerde kún panelderin ornatý jalǵasady. Bul jumystarǵa 2 trln sým (shamamen $154 mln) nesıe baǵyttalmaq.

Sonymen qatar, elektr energııasynyn shyǵynyn 15-20%-ǵa qysqartý úshin arnaıy baǵdarlama ázirlenedi. Aýaǵa bólinetin zııandy qaldyqtardyń kólemin azaıtý maqsatynda halyqaralyq qarjy ınstıtýttarynan $300 mln aqsha tartý josparlanǵan.

Eske salaıyq, keshe Qazaqstan, Ózbekstan jáne Qyrǵyzstannyń Energetıka mınıstrleri Tashkentte bas qosyp, «Qambar ata - 1» GES jobasyn iske asyrý múmkindigin talqylaǵan edi.

Aıta keteıik, Ózbekstanda elektr energııasynyń 80%-y gazben jumys isteıtin jylý elektr stantsııalarynda óndiriledi. Bul rette byltyr resmı Tashkent kógildir otyn ımportyn 2 ese arttyrdy.

Buǵan qosa, ótken jyly gaz ben elektr energııasyn zańsyz paıdalanǵan ózbekstandyqtar memleketke $108 mln shyǵyn keltirdi.