Bıyl Ózbekstan úkimeti 5,2 mln adamdy jumyspen qamtýdy josparlap otyr

TAShKENT. KAZINFORM — Bıyl Ózbekstan úkimeti 5,2 mln adamǵa jumys usynyp, kedeılik sheginde ómir súrip jatqan 1,5 mln turǵynnyń jaǵdaıyn jaqsartýǵa baǵyttalǵan sharalardy qabyldamaq, dep habarlaıdy Kazinform agenttiginiń menshikti tilshisi.

Bul týraly el prezıdenti Shavkat Mırzıeevtiń tóraǵalyǵymen ótken keńeste málim boldy.

Ózbekstan basshysynyń baspasóz qyzmetinen málim etkendeı, ústimizdegi jyly 60 qala men aýdanda kedeılikti joıýǵa baǵyttalǵan sharalar qabyldanady. Atap aıtqanda, kásipkerlerdiń kómegimen 1,5 mln ózbekstandyqty turaqty jumyspen qamtyp, taǵy 2 mln adamdy bızneske tartý josparlanyp otyr. Shaǵyn bıznes jobalaryn qoldaý maqsatynda 120 trln sým (shamamen $9,2 mlrd) nesıe bólý kózdelgen.

120-dan astam aýdanda turatyn tabysy tómen azamattarǵa orman sharýashylyǵy salasynda jumys usynylady. Otyrǵyzylǵan árbir 100 aǵash úshin olarǵa 375 myń sým (shamamen $30) sýbsıdııa tólenedi.

Eske salaıyq, Ózbekstan bıligi eldegi kedeılik deńgeıin 6%-ǵa deıin tómendetýge nıetti.

Buǵan deıin habarlaǵanymyzdaı, Ózbekstanda 500 áıeldi avtobýs júrgizýshisi mamandyǵyna oqytý josparlanyp otyr.

Bıyl Ózbekstan eksport kólemin 30 mlrd dollardan asyrýǵa nıetti.

Sonymen qatar, kórshi el bıligi qosylǵan qun salyǵynyń mólsherin 2028 jylǵa deıin kótermeıdi.