Bıyl Ózbekstan sý elektr stantsııalarynyń óndiris qýatyn 15%-ǵa arttyrady

TAShKENT. KAZINFORM — Bıyl Ózbekstan gıdroelektrostantsııalarda óndiriletin elektr qýatyn 15%-ǵa arttyrýdy josparlap otyr. Bul týraly «O’zbekgidroenergo» AQ Basqarma tóraǵasynyń orynbasary Farrýh Nýrýllaev málim etti, dep habarlaıdy Kazinform agenttiginiń Tashkenttegi menshikti tilshisi. 

— 2017 jyly respýblıkada jalpy qýaty 1 604 MVt bolatyn 36 gıdroelektrostantsııa bolsa, qazirgi ýaqytta 100-den astam sý elektr stantsııasy 2 400 MVt óndirip jatyr. Qamtylyp otyrǵan kezeńde 13 GES jóndeýden ótip, 64 jańa nysan paıdalanýǵa berildi. Bul jobalardy iske asyrý úshin 1,3 mlrd dollar ınvestıtsııa tartyldy, — dedi Farrýh Nýrýllaev.

Ol atap ótkendeı, byltyr «O’zbekgidroenergo» uıymyna qarasty kásiporyndar 6,5 mlrd kVt/saǵat elektr energııasyn óndirdi.

— 2026 jyly elektr energııasyn óndirý kólemin 15%-dan astamǵa arttyrý, 264 mln dollar ınvestıtsııany ıgerý josparlanyp otyr. Sonymen qatar bıyl jalpy qýaty 152 MVt bolatyn 15 jańa óndiristik nysan iske qosylady, 276 jumys orny qurylady, — dep uıymnyń josparlaryn jarııalady Farrýh Nýrýllaev.

Eske salaıyq, Ózbekstan «Qambarata-1» SES-in Qazaqstan jáne Qyrǵyzstanmen birlesip qarjylandyrmaq.

Buǵan deıin habarlaǵanymyzdaı, byltyr Brıýsselde «Qambarata-1» GES jobasyn júzege asyrýdyń máseleleri talqylandy.

Qosa ketsek, Ózbekstan Tájikstandaǵy «Rogýn» GES-inen elektr energııasyn ımporttaıdy.