Bıyl Ózbekstan DSU-nyń teń quqyly múshesi atanýǵa nıetti
TAShKENT. KAZINFORM – Kórshiles eldiń prezıdenti Shavkat Mırzıeev jaýapty sheneýnikterge Ózbekstannyń Dúnıejúzilik saýda uıymyna (DSU) qosylý protsesin bıyl aıaqtaý boıynsha tapsyrma berdi, dep habarlaıdy Kazinform agenttiginiń Tashkenttegi menshikti tilshisi.
Keńeste málim bolǵandaı, buǵan deıin DSU-ǵa qosylý boıynsha jumys tobynyń eki otyrysy uıymdastyrylǵan. Olardyń barysynda túrli usynys aıtylyp, 30-dan astam qujat jobasy talqylanǵan.
Sonymen qatar 40-tan astam ekijaqty kelissóz júrgizilip, byltyr 11 elmen kelisim jasaldy. Qazirgi ýaqytta ózbek tarapy 33 memleketpen tıisti hattamaǵa qol qoıdy. Munymen birge depýtattar ulttyq zańnamany DSU talabyna sáıkestendirip jatyr.
Jınalys sońynda Shavkat Mırzıeev Ózbekstannyń Dúnıejúzilik saýda uıymyna bıyl resmı qosylýyna baǵyttalǵan keshendi sharalardy iske asyrý jóninde tapsyrma berdi.
Buǵan deıin Ózbekstannyń DSU-ǵa qosylý protsesi keshigýi múmkin ekenin jazyp edik.
Eske salaıyq, Ózbekstan Taıvanmen kelissózden soń DSU-nyń teń quqyly múshesi atanbaq.
