Bıyl Ózbekstan 2,2 mln qazaqstandyq týrısti qabyldaýǵa nıetti
TAShKENT. KAZINFORM – Bıyl Ózbekstan 2,2 mln qazaqstandyq saıahatshyny qabyldaýdy josparlap otyr, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
2023 jyly Ózbekstanǵa barǵan qazaqstandyq týrısterdiń sany 1,3 mıllıonnan asty. Saıahatshylardyń kóbi Tashkent, Samarqand, Buhara jáne Hıýa qalalarynyń kórikti jerlerine jıi barady.
Ózbekstannyń Týrızm komıtetinen málim etkendeı, qazaqstandyqtar úshin Qaraqalpaqstan da tanymal týrıstik baǵyttardyń biri sanalady.
Sonymen qatar, shengenniń azııalyq balamasy retinde esepteletin Silk Road Visa jobasyn engizý boıynsha jumystar júrip jatyr. Bul elektrondy týrıstik vıza álem elderinen kelgen týrısterge birden birneshe memleketke saıahattap barýǵa múmkindik beredi.
«Qazirgi ýaqytta jobaǵa qatysýshy memleketter tarapynan normatıvtik-quqyqtyq jáne tehnıkalyq baǵyttaǵy mehanızmder men vıza mártebesin aıqyndaıtyn erejeni kelisý, quqyqtyq retteý rejımi sııaqty máseleler sheshilýde», - dep jaýap berdi vedomstvodan Kazinform tilshiniń saýalyna oraı.
Buǵan qosa, Qazaqstan men Ózbekstan biryńǵaı týrıstik brend pen aralas týrlardy uıymdastyrý baǵytyndaǵy jobalardy qolǵa aldy.
Sondaı-aq, memleketaralyq yntymaqtastyqtan ózge, Ortalyq Azııanyń «Bir týr - búkil óńir» biryńǵaı týrıstik brendin qurý josparlanyp otyr.
