Bıyl Otbasy bankte 1 mıllıon depozıt ashyldy
ASTANA. KAZINFORM — «Báıterek» holdınginiń enshiles uıymy – «Otbasy bank» úshin 2025 jyl rekordtyq jyl boldy. Bir jyldyń ishinde qazaqstandyqtar 1 mıllıon jańa depozıt ashty. Bul – bank tarıhyndaǵy eń joǵary kórsetkish. Buǵan deıin jyl saıyn orta eseppen 600 myńǵa jýyq jınaq shoty ashylyp kelgen. Atalǵan rekord qazaqstandyqtardyń «Otbasy bankke» degen joǵary seniminiń dáleli, ári banktiń turǵyn úı baǵdarlamalary halyq úshin eń qoljetimdi bolyp otyrǵanyn kórsetedi.
Qazirgi tańda «Otbasy bankte» 3,4 mıllıon qazaqstandyq baspana alý úshin qarajat jınap jatyr. Depozıt ıeleri jınaqtaryn belsendi túrde tolyqtyryp, jaqyn ýaqytta qoljetimdi sharttarmen turǵyn úı alyp óz páteriniń kiltin ıelenýdi josparlaýda. 2025 «Otbasy banktiń» 74 386 klıenti baspanaly bolyp, maqsaty júzege asty. Sonymen qatar, 2025 jyly «Otbasy bank» arqyly baspana alǵan árbir úshinshi qaryz alýshy ómirinde alǵash ret óz úıiniń ıesi atanǵan.
– 2000 jyldardyń basynan beri Qazaqstanda jyl saıyn shamamen 250 myń bala dúnıege kelip otyrdy. Solardyń kópshiliginiń ata-anasy alǵashqy páterin «Turǵyn úı qurylys jınaq banki» arqyly satyp alǵanyn bilip ósti. Al búginde sol salymshylarymyzdyń balalary ózderi depozıt ashyp, ony belsendi túrde tolyqtyryp, jeke baspanaǵa qol jetkizýdi armandap júr. Olar bankpen birge ósip keledi. Biz jınaq júıesiniń urpaqtan urpaqqa jalǵasyp, ondaǵan jyl boıy tıimdi jumys istep, bir otbasynyń artynan ekinshisine ómirdegi eń mańyzdy maqsattardyń biri – baspana satyp alýǵa kómektesip otyrǵanyn kórip otyrmyz. Dál osy maqsat jolynda «Otbasy bank» ár býyn úshin senimdi bola otyryp, damýyn jalǵastyryp, únemi jańaryp keledi, – dep atap ótti «Otbasy bank» basqarma tóraıymy Lázzat Ibragımova.
Depozıtterge degen qyzyǵýshylyqtyń basty qozǵaýshy kúshteriniń biri – «Naýryz» baǵdarlamasy boldy. Bul baǵdarlama Memleket basshysy Qasym-Jomart Toqaevtyń tapsyrmasymen iske qosylyp, Qazaqstanda ekinshi jyl qatarynan tabysty júzege asyrylyp keledi. Osy ýaqyt ishinde 15 387 azamat qonys toıyn atap ótti. «Naýryz» baǵdarlamasy azamattardy baspana alýǵa aldyn ala jınaq arqyly daıyndalýǵa úıretedi. Óıtkeni dál osy uqypty jınaq salymshylarǵa «Otbasy bankten» nesıeni tómen paıyzdyq mólsherlememen alýǵa múmkindik beredi.
Jumysshy mamandyqtar jyly aıasynda «Otbasy bank» zaýyttarda, fabrıkalarda jáne óndiris oryndarynda eńbek etip júrgen azamattardy qoldady. Olar kúrdeli jumysty atqaryp, el turǵyndarynyń negizgi qajettilikterin qamtamasyz etip otyr. Kópshiligi aýyr eńbek jaǵdaıynda jumys isteıdi. Sondyqtan olardyń turǵyn úı máselesin sheshý mańyzdy. Osy maqsatta bank Qazaqstanda alǵash ret «Naýryz Jumysker» atty jańa baǵytty iske qosty. Bul bastama eńbek adamdary úshin qoljetimdi baspanaǵa jasalǵan taǵy bir mańyzdy qadam boldy.
«Naýryz Jumysker» aıasynda 2 546 adam qonys toıyn atap ótti. Baǵdarlama 1 143 túrli kásiporyn qyzmetin jáne 8 230 jumysshy mamandyǵyn qamtıdy. Baǵdarlama boıynsha úı alý úshin konkýrsqa qatysýdyń qajeti joq. Jumys ornynan jumys berýshiniń qyzmet túri, qyzmetkerdiń laýazymy men mamandyǵy kórsetilgen anyqtama alyp, «Otbasy banktiń» eń jaqyn bólimshesine ótinim berý jetkilikti.
«Korporatıvtik» ónim jáne jaldaý-jınaqtaý mehanızmi de júzege asyrylyp keledi. Osy quraldyń arqasynda zaýyttarda, fabrıkalarda jáne túrli kásiporyndarda eńbek etetin 500-den astam qyzmetker óz jumys berýshileriniń jáne «Otbasy banktiń» qoldaýymen qonys toıyn atap ótti.
2025 jyly bank úshin taǵy bir mańyzdy oqıǵa – onyń Ulttyq damý ınstıtýty mártebesine ıe bolýy. Bul ózgeris banktiń memlekettik turǵyn úı saıasatyn iske asyrýdaǵy rólin túbegeıli keńeıtti. Úı kezeginde turǵan azamattardy esepke alý jáne baspana úlestirý protsesteri tsıfrlandyrylyp, avtomattandyryldy jáne orken.otbasybank.kz atty jeke tsıfrlyq platforma iske qosyldy. Bul platforma turǵyn úıdi bólý júıesiniń ashyqtyǵyn edáýir arttyrdy.
«Otbasy bank» Ulttyq damý ınstıtýty mártebesinde alǵash ret óńirlerde jalǵa beriletin jáne kredıttik turǵyn úıdi bólý jumystaryn bastap ketti. Qazirgi ýaqytta bul maqsatta oblystyq ákimdikter bankke 7 715 páterdi tapsyrdy. Nátıjesinde Pavlodar, Aqmola jáne Jetisý oblystarynyń turǵyndary qonys toıy atalyp ótilip jatyr. Al Jambyl, Shyǵys Qazaqstan, Aqtóbe, Ulytaý, Qaraǵandy, Abaı jáne Qyzylorda oblystarynda turǵyn úı berý jumystary jaqyn arada bastalady.
Jyl basynan beri memlekettik baǵdarlamalar aıasynda «Otbasy bank» 63,1 mlrd teńge somasyna turǵyn úı kezeginde turǵan 4 954 azamattyń qonys toıyn atap ótýine múmkindik berdi. Memlekettiń qoldaýynyń arqasynda búginde óz shańyraǵynda 1 jáne 2 toptaǵy 375 múgedek, 632 kópbalaly otbasy, múmkindigi shekteýli balalary bar 352 otbasy, sondaı-aq «jetim balalar» sanaty boıynsha turǵyn úı kezeginde turǵan 233 qazaqstandyq turyp jatyr.
2025 jyly bank turǵyn úı salý jáne satyp alý maqsatynda berilgen jalpy qaryz kóleminde 57% úleske ıe boldy. «Otbasy bank» Qazaqstandaǵy ekinshi deńgeıli bankter arasynda aktıvter boıynsha tórtinshi, óz kapıtaly boıynsha besinshi orynǵa ıe. Banktiń jyl sońyndaǵy nesıelik portfeli 3 994 413 mln teńge.