Bıyl otandyq taýar óndirýshilerdiń reestri iske qosylady – Ónerkásip mınıstri

ASTANA. KAZINFORM – Bıyl otandyq taýar óndirýshilerdiń reestri iske qosylady. Bul týraly QR Ónerkásip jáne qurylys mınıstri Ersaıyn Naǵaspaev aıtty.

— Bıyl otandyq taýar óndirýshilerdiń reestri iske qosylady, ol naqty ónim óndirýshilerdi anyqtaýǵa jáne qoldaýdyń nysanaly sıpatyn arttyrýǵa baǵyttalǵan. Onyń basty artyqshylyǵy tsıfrlyq verıfıkatsııa jáne toqsannan astam memlekettik derekqormen ıntegratsııalanǵan avtomattandyrylǵan tekserý júıesi bolady, - dep málimdedi mınıstr «Kazahstanskaıa pravda» basylymyna bergen suhbatynda. 

Spıker bul jańa bastamanyń otandyq taýar jáne ónim óndirýshilerge qandaı paıdasy baryn atap ótti. 

— Óndirýshiniń bul reestrde bolýy memlekettik satyp alýlarda jáne memlekettik qoldaý sharalary kezinde (qarjylaı da, qarjylaı emes qoldaý kezinde de) mindetti talapqa aınalady. Bul sharalar túrli salalarda turaqty ósimge qol jetkizýge, otandyq taýar óndirýshilerdi qoldaýǵa, ımportqa táýeldilikti azaıtýǵa jáne Qazaqstannyń ınvestıtsııalyq tartymdylyǵyn arttyrýǵa baǵyttalǵan, - dedi vedomstvo basshysy. 

Aıta keteıik, elimizde ST-KZ sertıfıkaty men Indýstrııalyq sertıfıkattyń ornyna qazaqstandyq taýarlar reestri ázirlenip jatyr. Buǵan deıin zańdaǵy basty jańalyqtar týraly Májilis depýtaty Ekaterına Smyshlıaeva aıtyp bergen edi.