Bıyl Ortalyq Azııa men Eýropa Odaǵynyń Ekonomıkalyq forýmy Ózbekstanda ótedi

TAShKENT. KAZINFORM — Ortalyq Azııa men Eýropa Odaǵynyń ekonomıka jáne ınvestıtsııalar jónindegi forýmy bıyl qarashada Ózbekstanda ótedi, dep habarlaıdy Kazinform agenttiginiń menshikti tilshisi.

Josparlanyp otyrǵan aýqymdy is-shara jaıly Eýropa Odaǵynyń Ózbekstandaǵy elshisi Toıvo Klaar málim etti.

— Biz qarasha aıynda Eýropa Odaǵy men Ortalyq Azııanyń ekonomıka jáne ınvestıtsııalar jónindegi forýmyn ótkizýdi josparlap otyrmyz. Onda óńirlerdiń kásipkerlik saladaǵy yntymaqtastyǵy talqylanady, — dedi Eýropa Odaǵynyń Ózbekstandaǵy elshisi.

Buǵan qosa Toıvo Klaar bıyl Ózbekstan prezıdenti Shavkat Mırzıeev Belgııaǵa resmı saparmen barýy múmkin ekenin aıtty. Onyń aıasynda Keńeıtilgen seriktestik pen yntymaqtastyq týraly kelisimge qol qoıý josparlanǵan.

Ortalyq Azııa men Eýropa Odaǵynyń ekonomıka jáne ınvestıtsııalar jónindegi alǵashqy forýmy Qyrǵyzstanda, ekinshisi Qazaqstanda ótken bolatyn.

Eske sala keteıik, bıyl 4 sáýirde Ózbekstannyń Samarqand qalasynda «Ortalyq Azııa — Eýropa Odaǵy» formatyndaǵy alǵashqy sammıt ótti. Onyń barysynda Memleket basshysy Qasym-Jomart Toqaev birqatar bastama kóterdi.

Qosa keteıik, bıyl 5 mamyrda Samarqand qalasynda ótýi tıis bolǵan «Ortalyq Azııa — Shyǵanaqtaǵy arab memleketteriniń yntymaqtastyǵy keńesiniń» ekinshi sammıti keıinge qaldyryldy.