Bıyl orman órti 3 esege azaıdy — Shyńǵys Árinov
ASTANA. KAZINFORM — Bıyl tabıǵı órtterge jedel den qoıý máselesi tolyǵymen qaıta qaralady. Bul týraly Úkimet otyrysynda tótenshe jaǵdaılar mınıstri Shyńǵys Árinov baıandady.
Mınıstrdiń aıtýynsha, eń aldymen, negizgi basymdyq órttiń aldyn alý men órt oshaqtaryn erte anyqtaýǵa berildi.
Bul turǵyda, táýlik boıy órt jaǵdaıyna monıtorıng júrgizip otyrý úshin «Ertis Ormany», «Býrabaı», «Semeı Ormany», «Medeý», sondaı-aq Qostanaı oblysy orman sharýashylyqtarynyń, beınebaqylaý júıeleri Mınıstrliktiń Daǵdarys ortalyǵyna qosylǵan. Qosymsha «Orman» jáne «Tabıǵat» júıeleri biriktirilgen.
Sonymen qatar, naızaǵaıdyń belsendiligi men termaldy núkteler týraly málimetterge taldaý jasaý arqyly órttiń tutanýyna den qoıylady. Mınıstrliktiń bólimsheleri pılotsyz ushý apparattary arqyly óńirlerdi áýeden sholyp qarap barlaý júrgizedi.
«Ekinshiden, biz mınıstrlik bólimsheleriniń tabıǵı órtterge jedel den qoıý sharalaryn kúsheıttik. Kúshter men quraldardyń toptamasy turaqty daıyndyqta ustalady, óńirlerde sý tógý qurylǵylary bar 34 áýe borty qoıyldy», — dep málimdedi Shyńǵys Árinov.
Sonymen qatar mınıstrliktiń kúshimen 37 orman sharýashylyǵyna kúzet uıymdastyryldy. Búgingi tańda olar 23 órtti joıyp, 60-tan astam jedel shyǵýdy júzege asyrǵan.
Al, Tótenshe jaǵdaılar mınıstrliginiń bólimsheleri joq eldi mekenderdi qorǵaý maqsatynda erikti órt sóndirý qurylymdary men órt sóndirý beketterin qurý jumysy jalǵasýda. Bıyl 43 erikti qurylym men 26 beket qurylǵan.
«Úshinshiden, mobıldi toptar reıdter júrgizýdi jalǵastyryp otyr. Búgingi tańda 11 myń reıd júrgizilip, 3 myńnan astam zań buzýshylar ákimshilik jaýapkershilikke tartyldy», — dedi mınıstr.
Sondaı-aq elimizde alǵash ret ishki ister jáne ekologııa jáne tabıǵı resýrstar Mınıstrlikterimen birlesip «ORMAN» jedel-tekserý sharalary ótkizildi. Birlesken jumystyń nátıjesinde 802 tulǵanyń zańsyz áreketterine tosqaýyl qoıyldy.
«Jalpy alǵanda, oń dınamıka baıqalady, naqtyraq aıtsaq, orman órtteri 3 esege, dala órtteri 2 esege azaıdy. Mınıstrlik bólimsheleri osy qarqynmen tabıǵı órtterge jedel den qoıýdy jalǵastyratyn bolady», — dep túıindedi baıandamasyn Shyńǵys Árinov.
