Bıyl ońtústiktegi dıqandarǵa sý byltyrǵydan 335 mln tekshe metrge artyq berildi
ASTANA. KAZINFORM — Búgingi tańda «Qazsýshar» RMK fılıaldary Almaty, Jambyl, Qyzylorda, Túrkistan jáne Jetisý oblystarynyń dıqandaryna 3 mlrd 73 mln tekshe metrden astam sý berdi. Bul týraly Sý resýrstary jáne ırrıgatsııa mınıstrligi málim etti.
Bul byltyrmen salystyrǵanda 335 mln tekshe metrge kóp. 2024 jyldyń osy kezeńinde 2 mlrd 738 mln tekshe metr sý jetkizilgen bolatyn.
Almaty oblysynyń sharýalaryna 50 mln tekshe metrden astam sý berildi, bul bir jyl burynǵydan 6 mln tekshe metrge artyq.
Jambyl oblysynyń dıqandaryna 135 mln tekshe metrden astam sý berildi, bul ótken bir jylmen salystyrǵanda shamamen 50 mln tekshe metrge artyq.
Al Jetisý oblysyndaǵy sý paıdalanýshylarǵa 196 mln tekshe metr sýarmaly sý jiberildi. Qyzylorda oblysynyń dıqandaryna 1 mlrd 280 mln tekshe metrden astam sý berildi, bul bir jyl burynǵydan 74 mln tekshe metrge artyq.
Túrkistan oblysynyń sharýa qojalyqtaryna 1 mlrd 412 mln tekshe metrge jýyq sý berildi.
Bul byltyrmen salystyrǵanda 234 mln tekshe metrge artyq. Qazirgi ýaqytta joǵaryda atalǵan bes oblysta 348 myń gektardan astam egistik alqaptary sýaryldy. Onyń 25 817 gektary Almaty oblysyna, 42 600 gektary Jambyl oblysyna, 33 674 gektary Jetisý oblysyna, 126 300 gektary Qyzylorda oblysyna, 119 900 gektary Túrkistan oblysyna tıesili.
– Sý resýrstary jáne ırrıgatsııa mınıstri Nurjan Nurjigitovtiń tapsyrmasymen vedomstvo mamandarynan quralǵan tórt jumys toby quryldy. Olar sýdyń zańsyz paıdalanylýyn anyqtaıdy, sondaı-aq Qazaqstannyń ońtústiginde sýdy únemdeý, retteý jáne bólý máseleleri boıynsha monıtorıng júrgizedi. Sonymen qatar sý únemdeý tehnologııalaryn engizý, ylǵal súıgish daqyldardyń kólemin qysqartý jáne túngi sýarý ádisin qoldaný boıynsha túsindirý jumystary júrgizilýde. Kanaldar arqyly sýdy kezekpen jiberý kesteleri ázirlenip, iske asyrylyp jatyr, – dedi Sý resýrstary jáne ırrıgatsııa birinshi vıtse-mınıstri Nurlan Aldamjarov.
Eske sala keteıik, buǵan deıin sý salasy qyzmetkerleriniń jalaqysy 50%-ǵa deıin ósetinin jazǵan edik.