Bıyl óńirlerdegi kómirdiń tonnasy qansha

ASTANA. KAZINFORM – Ónerkásip jáne qurylys mınıstrliginiń Ónerkásip komıteti tóraǵasynyń orynbasary Turar Jolmaǵambetov kómirdiń kenishtegi jáne satylymdaǵy baǵasyn atady.

«Búgin kómirdiń kenishtegi baǵasyna toqtalǵym keledi. Qazirgi ýaqytta negizgi jetkizýshilerdegi kómirdiń bir tonnasy 7,1 myń teńge men 9 myń teńgeniń aralyǵynda. Aıtalyq, búginde «Shubarkól kómirdiń» 1 tonnasy kenishte 8 myń teńge turady. Ótken jylmen salystyrǵanda 900 teńgege qymbattaǵan. Byltyr tonnasy 7 100 teńge bolǵan edi. Shyǵystaǵy «Qarajyrada» byltyr tonnasy 8 500 teńge bolsa, bıyl 200 teńgege qymbattap, 8 700 teńgege jetti. Al, osy maýsymda «Maıkóben-Vest» kómiriniń tonnasy 7 750 teńgeden bastalady. Byltyr 7 100 teńge deńgeıinde boldy. Ósim – 650 teńge. «Shubarkól premıým» kómiriniń tonnasy – 9 myń teńge, ózgeris joq. Byltyr da osy baǵada satylǵan», - dedi ol Ortalyq kommýnıkatsııalar qyzmetindegi brıfıngide. 

Osy oraıda Turar Jolmaǵambetov óńirlergi kómirdiń 1 tonnasy 8 myń men 26 myń teńge aralyǵynda ekenin aıtady. 

«Alshaqtyq tym joǵary. Kenishke taqaý ornalasqan eldi mekender sol jerden birden baryp, tonnasyn 8 myń teńgeden alyp ketedi. Biraq, bizde kómir kenishinen tym alysta ornalasqan shalǵaıdaǵy óńirler bar. Munyń ústine atalǵan óńirlerde temir jol tuıyǵy da bolmaýy múmkin. Osyǵan baılanysty eldi mekenge deıin jetkizý joly uzaq bolýy yqtıal. Sondyqtan da baǵasynda úlken aıyrmashylyq bar», - dedi komıtet tóraǵasynyń orynbasary.

Eske sala keteıik, buǵan deıin Qazaqstanda 7 aıda 58,1 mln tonna kómir óndirilgenin jazǵan edik.