«Bıyl ónim mol»: Túrkistan oblysynda vegetatsııa kezeńi aıaqtalýǵa jaqyn
TÚRKІSTAN. KAZINFORM – Túrkistan oblysynda vegetatsııa kezeńi aıaqtalyp keledi. Óńirdegi sharýa qojalyqtary sýarmaly sýdy der kezinde jetkizip otyrǵany úshin Sý resýrstary jáne ırrıgatsııa mınıstrligine alǵys bildirip jatyr.
Qazir Ordabasy, Saýran jáne Otyrar aýdandaryndaǵy maqta alqaptaryn sýarý aıaqtaldy. Maqtaaral, Jetisaı jáne Shardara aýdandarynda da sýarý jumystary aıaqtalýǵa jaqyn.
Sý resýrstary jáne ırrıgatsııa mınıstrligi málimetinshe, vegetatsııa kezeńinde mınıstrlik jumys toptaryn qurǵan. Jumys toptary ońtústik óńirlerdegi sý sharýashylyǵy jaǵdaıyn baqylap otyrdy. Sondaı-aq mamandar sýarmaly sýdyń ádil bólinýin qadaǵalap, kanaldar arqyly kezekpen sý berý kestelerin bekitti jáne zańsyz sý alý derekterin anyqtaý úshin tekserýler júrgizdi. Sharýalar sý salasy mamandarynyń eńbegin joǵary baǵalap otyr.
- Bıyl aptap ystyqqa baılanysty jumysty erterek bastadyq. Shildeniń 1-inen bastap sý aldyq. Bizdiń 22-shi kanalda 4200 gektarǵa jýyq jer bar. Sonyń 3100 gektary maqta. Egistikti ýaqytyly sýardyq. Sýǵa qatysty jumysqa atsalysqan barlyq azamatqa raqmet, sonyń ishinde Sý resýrstary jáne ırrıgatsııa mınıstrligine alǵys aıtamyn, - dedi sharýa Qalmyrza Beısenbaev.
Túrkistan oblysyndaǵy sharýalar sý jetkizý sapasynyń jaqsarǵanyn da atap ótti.
- Aldyńǵy jyldary bul jerler sorǵymen sýarylatyn. Bıyl Sý resýrstary jáne ırrıgatsııa mınıstrliginiń mamandary qabyldaǵan sharalardyń arqasynda sý sorǵysyz, óz aǵynymen sýarylyp jatyr, - dep aıtty Jetisaı aýdanyndaǵy «Agro-Birlestik» aýyl sharýashylyǵy óndiristik kooperatıviniń jetekshisi Tórehan Dúısenbıev.
- Bıyl ónim mol. «Qazsýshardyń» ýaqytyly sý jetkizgeniniń arqasynda eshqandaı qıyndyq bolǵan joq. Sý men tehnıka jaǵynan da másele týyndamady. Tipti bıyl jazda temperatýra 50 gradýsqa jetse de, mol ónim aldyq, – dedi sharýa Hahramon Jumaev.
Aıta keteıik, Astanadaǵy jármeńkege Túrkistan oblysynyń sharýalary 600 tonnadan astam ónim ákeldi.