Bıyl óńdeý ónerkásibinde 1,3 trln teńgege 180 ınvestıtsııalyq joba iske qosyldy

ASTANA. KAZINFORM – Ónerkásip jáne qurylys vıtse-mınıstri Oljas Saparbekov óńdeý ónerkásibi salasynda iske asyp jatqan ınvestıtsııalyq jobalar týraly aıtyp berdi.

«Investıtsııalyq ahýaldy jaqsartyp, nátıjeli jumys úshin ónerkásiptik jobalardy iske asyrý kerek. Bıyl óńdeý ónerkásibi salasynda shamamen 1,3 trln teńge somaǵa 180 ınvestıtsııalyq jobany iske qosyp, 14,9 myń turaqty jumys ornyn ashý josparlandy. Jyl basynan beri 283,1 mlrd teńge qarjyǵa 56 joba iske asyrylyp, 3,8 myńǵa jýyq turaqty jumys orny quryldy. Qalǵan jobalar boıynsha qurylys-montaj jumystary aıaqtaldy, jyl sońyna deıin iske qosýdy kózdep otyrmyz», - dedi Oljas Saparbekov OKQ-de ótken brıfıngide. 

Sonymen qatar, vıtse-mınıstr orta merzimdi perspektıvada qolǵa alynatyn birqatar jańa jobaǵa toqtaldy. 

«Tamaq ónerkásibine arnalǵan qaptamalardy, atap aıtqanda Tetra Pak (60 myń tonna) qaptamasyn jáne alkogolsiz sýsyndarǵa arnalǵan alıýmınıı qutylardy (1 147 mln dana) shyǵarýdy qolǵa alý josparda bar», - deıdi mınıstrdiń orynbasary. 

Buǵan deıin habarlaǵanymyzdaı, bıyl segiz aıda elimizde júk vagondaryn shyǵarý alty ese ulǵaıǵan. 

Bıyl qazaqstandyq óńdeý ónerkásibi eksporty segiz aıda 17,8 mlrd dollarǵa jetti. 

Aıta ketsek, elimizde taýar óndirýshilerdiń biryńǵaı reestri jasalady. Zań jobasy Májilistiń qaraýynda.