Bıyl on aıda 7 myńǵa jýyq qazaqstandyq Ózbekstanda em alǵan

TAShKENT. KAZINFORM — Bıyl qańtar-qazan aılary aralyǵynda 75 myńnan astam sheteldik Ózbekstanda em aldy, dep habarlaıdy Kazinform agenttiginiń menshikti tilshisi.

Ulttyq statıstıka komıtetiniń málimetinshe, qamtylyp otyrǵan kezeńde Ózbekstanǵa emdelý maqsatynda kelgenderdiń kóbi Tájikstan azamattary (53 045 adam).

Sondaı-aq, dertine daýa izdegen qyrǵyzstandyqtar da (13 038 adam) az emes.

Al on aı ishinde 6 979 Qazaqstan azamaty Ózbekstanda em alypty. Kelýshilerdiń basym kópshiligi Tashkent jáne Samarqand qalalaryndaǵy klınıkalardyń qyzmetine júgingen.

Munymen birge, Reseı (1 709 adam), Aýǵanstan (533 adam), Túrikmenstan (215 adam) jáne Túrkııadan (43 adam) kelgen naýqastar da bar.

Eske salaıyq, buǵan deıin Tashkentke em alýǵa baratyn búldirshinderdiń 90% Qazaqstannan ekenin jazyp edik.

Buǵan deıin habarlaǵanymyzdaı, ústimizdegi jyldyń 9 aıynda Ózbekstan Qazaqstannan 2,4 mlrd dollardyń taýaryn ımporttaǵan.