Bıyl on aıda 44 myń adamdy ıt qapty – mınıstrlik
ASTANA. KAZINFORM – Elimizde jyl saıyn 50-60 myń adam buralqy ıtterden zardap shegedi.
Bul týraly Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń asa qaýipti ınfektsııalardy qadaǵalaý jáne bıologııalyq qaýipsizdik basqarmasynyń basshysy Janat Jamalbekova málim etti.
«Elimizde jyl saıyn qutyrma aýrýyna qarsy 200 myń dozadan asa vaktsına bólinedi. Buralqy ıtterden zardap shekkenderdiń sany ósip otyr, jylyna 50-60 myń adam zardap shegedi. Bıyl 10 aıdyń ishinde 44 myń adamdy ıt qapqan, bul tek medıtsınalyq kómekke júgingenderdiń resmı deregi, negizi odan da kóp bolýy múmkin», - dedi Janat Jamalbekova agenttik tilshisiniń saýalyna jaýap bere turyp.
Odan ári Densaýlyq saqtaý mınıstrliginiń ókili buralqy ıtter men basqa da janýarlardan juǵatyn qutyrma aýrýy problemasyn kóterdi.
«Qutyrmanyń klınıkalyq belgileri bastalǵanda adamǵa eshqandaı medıtsınalyq kómek, dári-dármek kómektespeıdi, ókinishke qaraı qaıtys bolady. Osy oraıda buralqy ıtterdiń sanyn azaıtý bastamasyn qoldaımyz, sebebi adamdar kóbine qańǵybas ıtterden zardap shegedi, olardyń deni 14 jasqa deıingi balalar. Sonymen qatar qutyrma ıt, mysyqtan bólek, tórt túlikten de juǵýy múmkin», - deıdi ol.
Búgin Májilistiń Ekologııa máseleleri jáne tabıǵat paıdalaný komıteti «Janýarlarǵa jaýapkershilikpen qaraý týraly» Qazaqstan Respýblıkasynyń Zańyna ózgerister men tolyqtyrýlar engizý máselelerine arnalǵan dóńgelek ústel ótti.
Aıta ketsek, Іshki ister mınıstrligi ókili ıesi bar ıt adamdy qapsa qylmystyq jaza qoldanýǵa qatysty usynys túskenin málim etti. Sonymen qatar úı janýaryn serýendetý tártibin qaıta-qaıta buzatyn azamattardan ony tárkileýdi usynyp otyr.
