Bıyl Muhtar Áýezov pen Baýyrjan Momyshulynyń kitaptary ózbek tiline aýdarylady

TAShKENT. KAZINFORM – Bıyl Muhtar Áýezovtiń «Abaı joly» romany men Baýyrjan Momyshulynyń «Qolbasshynyń kúndeligi» atty kitaby ózbek tiline aýdarylady. Bul týraly Kazinform tilshisiniń saýalyna jaýap bergen Ózbekstan Jazýshylar odaǵyna qarasty Qazaq ádebıeti keńesiniń tóraǵasy Tursynáli Ahmetov málim etti.

- Ózbekstandaǵy qazaq jazýshylary ózderiniń tól týyndylaryn jazýmen qatar, kórkem aýdarma salasyna da erekshe kóńil bóledi. Atap aıtqanda, búginde qazaq batyry Baýyrjan Momyshulynyń «Qolbasshynyń kúndeligi» atty kitabyn ózbek tiline aýdaryp, ony basyp shyǵarý boıynsha jumys júrgizilip jatyr. Eńbek taıaýda jaryq kóredi degen senimdemiz. Tıisinshe, ózbekstandyq oqyrman Baýyrjan Momyshulynyń ádebı murasymen tanysady, - dedi Tursynáli Ahmetov Kazinform tilshisiniń saýalyna jaýap bere otyryp.

Sonymen qatar bıyl Ózbekstanda Abaı Qunanbaıulynyń 180 jyldyǵy atalyp ótedi. Onyń aıasynda Muhtar Áýezovtiń «Abaı joly» romanyn ózbek tiline tárjima jasaý josparlanyp otyr.

- Abaı Qunanbaıulynyń 180 jyldyǵyn keń kólemde atap ótý kózdelgen. Bul baǵyttaǵy is-sharalar óńirlerde bastalyp ta ketti. Uly Abaıdyń shyǵarmashylyǵyna arnalǵan konferentsııalar, keshter men jyr músháıralary ótip jatyr. Bárimiz biletindeı, Muhtar Áýezovtiń «Abaı joly» romany ádebıetke qubylys ákeldi. Kezinde bul eńbek ózbek tiline aýdarylǵan. Degenmen bıyl osy kitapty ózbek tiline qaıta tárjima jasap, oǵan jańasha renk berýdi josparlap otyrmyz. Jýyrda bul jumystardyń nátıjesin jarııalaımyz, - dep málim etti Tursynáli Ahmetov.

Eske salaıyq, búginde Ózbekstanda Abaıdyń 180 jyldyǵy keńinen toılanyp jatyr.

Qosa ketsek, byltyr Qazaqstannyń Tájikstandaǵy mádenıet kúnderi aıasynda Fırdaýsı atyndaǵy mádenıet jáne demalys saıabaǵynda qazaq aqyny jáne oıshyly Abaı Qunanbaıulynyń bıýsti ornatylady.