Bıyl múgedektigi bar adamdar ınvataksı qyzmetine 112 myńnan astam tapsyrys berdi
ASTANA.KAZINFORM - QR Eńbek jáne halyqty áleýmettik qorǵaý mınıstrliginiń bastamasymen erekshe qajettilikteri bar adamdarǵa ınvataksı qyzmetin kórsetý kezinde taksı agregatorlaryn paıdalaný jónindegi pılottyq jobany iske asyrý sheńberinde 2026 jyldyń basynan beri Astana jáne Almaty qalalarynda atalǵan qyzmet 112,6 myń ret kórsetildi, onyń ishinde aqpan aıynda – 35,4 myń ret.
Esterińizge sala keteıik, 2025 jyldyń qorytyndysy boıynsha múgedektigi bar adamdar ınvataksı qyzmetin 489,8 myń ret paıdalanǵan.
Buǵan deıin ınvataksı qyzmetine tapsyrys berý úshin sapardan bir kún buryn telefon arqyly jazylý qajet bolatyn. Bul aıtarlyqtaı qolaısyzdyqtar týǵyzdy: ár sapardy aldyn ala josparlaýǵa, kólikti uzaq kútýge týra keldi, sondaı-aq mamandandyrylǵan kólik sany shekteýli boldy.
Qyzmetti barynsha yńǵaıly ári jedel etý maqsatynda Qazaqstan Respýblıkasy Eńbek jáne halyqty áleýmettik qorǵaý mınıstrligi Astana jáne Almaty qalalarynyń ákimdikterimen birlesip taksı agregatorlaryn tartý jónindegi pılottyq jobany bastamashylyq etti.
«ıAndeks» kompanııasy jobany qoldap, oǵan komıssııa almaı qatysyp jatyr. Bul sapar qunynyń tolyq kólemin tikeleı múgedektigi bar jolaýshylarǵa kórsetiletin qyzmet aqysyn tóleýge baǵyttaýǵa múmkindik berdi.
Múgedektigi bar azamattar pılottyq joba aıasynda jeńil avtokólikterge tapsyrysty ıAndeks Go mobıldi qosymshasy arqyly bere alady. Bul qyzmet alýshy úshin kólikti jedel tańdaýǵa, tapsyrys mártebesin onlaın rejımde qadaǵalaýǵa jáne jasalǵan saparlarǵa monıtorıng júrgizýge múmkindik beredi. Sondaı-aq qosymshada múgedektigi bar adamdar júrgizýshini sapar barysyndaǵy qajettilikteri týraly aldyn ala habardar ete alýy úshin arnaıy múmkindikter ekrany qarastyrylǵan. Óz kezeginde, júrgizýshiler jolaýshyny kólikke otyrǵyzý jáne odan túsirý kezinde kómek kórsetý tártibi boıynsha arnaıy nusqaýlar alady.
Eńbek jáne halyqty áleýmettik qorǵaý mınıstrligi bıyl Astana jáne Almaty qalalarynda jobany júzege asyrý pılottyq rejımde jalǵasatynyn eske saldy.
Aıta keteıik, Qazaqstanda múgedektigi bar azamattarǵa kórsetiletin ınvataksı qyzmetin jetildirý máselesi talqylandy. QR Eńbek jáne halyqty áleýmettik qorǵaý mınıstri Asqarbek Ertaev múgedektigi bar balalardyń ata-analarymen jáne qoǵamdyq birlestikter ókilderimen keńeıtilgen jumys kezdesýin ótkizip, ınvataksı qyzmetin alýǵa negiz bolatyn medıtsınalyq kórsetilimder tizbesin ázirleý máselesin qarastyrdy.