Bıyl monoqalalarǵa 62,8 mlrd teńge bólinedi
ASTANA. KAZINFORM – Bıyl monoqalalarǵa 62,8 mlrd teńge bólinedi. Bul týraly Úkimet otyrysynda Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.
«Ótken jyldyń qorytyndysy boıynsha monoqalalardyń ınjenerlik jáne áleýmettik ınfraqurylymynyń ortasha qamtamasyz etilýi Óńirlik standarttar júıesine sáıkes 88,8 paıyzdy qurady. Bul rette orta eseppen alǵanda sý qubyry jelileriniń tozýy – 55,8, káriz jelileriniń tozýy – 66,5, jylý jelileriniń tozýy 54,4 paıyzdy quraıdy. Sondaı-aq áleýmettik nysandar men kólik ınfraqurylymyn salý men jóndeýge degen qajettilik bar», - dedi ol.
Mınıstrdiń aıtýynsha, ekonomıkanyń naqty sektoryn damytý jáne ınfraqurylymdyq máselelerin júıeli sheshý maqsatynda Altaı, Balqash, Jitiqara, Lısakov, Rıdder, Stepnogorsk qalalaryn damytýdyń 2023-2027 jyldarǵa arnalǵan keshendi josparlary bekitildi. Keshendi josparlarda ónerkásip obektilerin, áleýmettik jáne ınjenerlik ınfraqurylymdyq nysandaryn salýǵa 456,6 mlrd teńgege 326 is-shara kózdelgen. 2023 jyldyń qorytyndysy boıynsha 37 is-shara oryndaldy, 131-i boıynsha iske asyrý bastaldy.
«Monoqalalardy qarjylandyrýǵa toqtala ketsek, múddeli ortalyq memlekettik organdar men oblystardyń ákimdikteri tarapynan ınfraqurylymdy damytýǵa jyl saıyn turaqty túrde qarajat bólinedi. Osylaısha, 2019-2023 jyldary aralyǵynda 348,4 mlrd teńge bólindi. Onyń ishinde respýblıkalyq bıýdjetten – 184 mlrd teńge. 2024 jyly osy maqsattarǵa 62,8 mlrd teńge josparlanǵan. Onyń ishinde respýblıkalyq bıýdjetten – 31,2 mlrd teńge», - dedi Nurlan Baıbazarov.
