Bıyl memlekettik orman qorynda 0,41 gektar aýmaqty qamtyǵan 3 órt tirkeldi
ASTANA. KAZINFORM – 15 maýsymdaǵy jaǵdaı boıynsha Qazaqstannyń memlekettik orman qory aýmaǵynda jalpy aýdany 0,41 gektardy quraıtyn 3 orman órti tirkeldi. Bul týraly Ekologııa jáne tabıǵı resýrstar mınıstrligi málimdedi.
Vedomstvo málimetinshe, tirkelgen órtterdiń ormandy alqaptaǵy aýdany 0,01 gektardy, al ormansyz alqaptaǵy aýdany 0,4 gektardy quraǵan.
«Tirkelgen órtterdiń ekeýi oqshaýlanyp, bireýi tolyq sóndirildi. Barlyq órt oshaqtary der kezinde anyqtalyp, orman kúzeti kúshterimen jedel túrde tıisti jumystar júrgizildi. Bólimshelerdiń joǵary daıyndyq deńgeıiniń, órt týraly habarlamalarǵa jedel den qoıýynyń jáne orman kúzeti qyzmetkerleriniń úılesimdi is-qımylynyń arqasynda órtter az aýmaqta oqshaýlanyp, sóndirildi», – dep habarlady vedomstvo.
Mınıstrliktiń atap ótýinshe, qabyldanǵan sharalardyń nátıjesinde memlekettik orman qoryna eleýli zalal keltirýdiń aldyn alý múmkin boldy.
Ekologııa jáne tabıǵı resýrstar mınıstrligi orman alqaptarynda órt qaýipsizdigi talaptaryn qatań saqtaýǵa shaqyryp, turǵyndarǵa tabıǵat aıasynda demalý kezinde otpen jumys isteýde asa saq bolý qajettigin eskertti.
2025 jyly elimizdiń orman qorynda ondaǵan órt tirkelip, olardyń basym bóligi adam faktorynan týyndaǵan bolatyn.
Aıta keteıik, keshe Katonqaraǵaıdyń orman alqabynda órt shyqqany habarlandy.
