Bıyl memlekettik qyzmetke kir keltirgen 92 maman jaýapqa tartyldy – Memlekettik qyzmet isteri agenttigi
Buryn memlekettik apparatqa jumysqa kirý jabyq kasta sııaqty boldy. Muny Memlekettik qyzmet isteri agenttiginde BAQ jáne qoǵam ókilderi úshin uıymdastyrylǵan baspasóz týry barasynda vedomstvo basshysy Darhan Jazyqbaı málim etti, dep habarlaıdy Kazinform.
Kezdesý barysynda agenttik tóraǵasy Darhan Jazyqbaı memlekettik qyzmetke ornalasý protsesterin jeńildetý, talantty jáne kreatıvti mamandardy tartý, bıýrokratııadan arylý boıynsha qabyldanyp jatqan sharalarǵa toqtaldy.
«Byltyr Memleket basshysy agenttiktiń aldyna úlken mindetter qoıǵan bolatyn. Atap aıtsam, qyzmettiń ashyqtyǵyn qamtamasyz etý, merıtokratııa qaǵıdalaryn ustaný, agenttikti tolyq HR-ınstıtýtqa aınaldyrý. Sonymen qatar adamǵa baǵdarlanǵan servıstik apparat qurý mindeti tur», - dep toqtaldy Darhan Jazyqbaı.
Agenttik tóraǵasy bul tapsyrmalarǵa saı, naqty jumys qolǵa alynǵanyn aıtty. Máselen, byltyrdan beri vedomstvo 4 zańǵa ózgeris engizgen.
«Onyń ishinde, memlekettik qyzmetke kirý jáne memlekettik qyzmet kórsetýge qatysty zańdar bar. Sondaı-aq, QR Ákimshilik quqyq buzýshylyq kodeksine de ózgeris engizdik», - dedi ol.
Búginde álem elderi memlekettik basqarý salasynda eki modelge súıenedi. Biri – mansaptyq, ekinshisi – pozıtsııalyq. Agenttik basshysy atap ótkendeı, 2016 jyly qabyldanǵan zań aıasynda Qazaqstandaǵy memlekettik qyzmet tolyq mansaptyq modelge negizdelgen edi.
«Osyǵan baılanysty memlekettik apparatqa jumysqa kirý «jabyq kasta» sııaqty boldy. ıAǵnı, joǵary laýazymdy ıelený úshin tómengi laýazymnan bastap jumysqa ornalasý kerek. Al qazir biz osy eki modeldi teń qarastyra otyryp, qazaqstandyq modeldi qalyptastyryp jatyrmyz. Qos modeldiń de úzdik tustaryn ózimizge engizip jatyrmyz», - deıdi Darhan Jazyqbaı.
Prezıdent Qasym-Jomart Toqaev memlekettik qyzmet salasyna bilikti ári talantty jastardy tartý mindetin qoıǵany belgili. Osyǵan baılanysty agenttik grant negizinde oqyǵan, GPA kórsetkishi 3.33 deńgeıinen joǵary jastarǵa múmkindik usyndy. ıAǵnı, olar aýdandyq nemese aýyldyq apparattarda tómengi laýazymdarǵa konkýrstyq irikteýsiz, tikeleı taǵaıyndalady.
Jalpy, búginde el boıynsha 82 528 memlekettik qyzmetshi san-salada eńbek etip júr. Olardyń 56,8 paıyzy – áıelder.
«Bıyl «Memlekettik qyzmet týraly» zańnamaǵa biraz ózgeris engizildi. Qyzmetkerdi basqa óńirge rotatsııalaý kezinde turǵyn úı tólemderin engizý, naqty jobalardy iske asyrý úshin kelisimshart boıynsha jumyskerler tartý múmkindigi paıda boldy. Óńirlik memlekettik organdardyń kadrlyq tapshylyǵyn joıý boıynsha óńirlik rezervter qurylady. Ózderińiz biletindeı, Memleket basshysy memlekettik qyzmetke kirý men shyǵýdy ońtaılandyrý boıynsha tapsyrma bergen edi. Agenttik tıisti sharalardy kezeń-kezeńimen iske asyryp kele jatyr. Birinshisi - agenttik kelisimimen «B» korpýsyn joǵary laýazymdarǵa konkýrssyz, tikeleı taǵaıyndaý qarastyrylǵan. Bul jeke sektordan bilikti jáne salalyq tájirıbesi bar mamandardy tartýǵa múmkindik beredi. Zań qoldanysqa engizilgennen keıin agenttikpen osyndaı 188 taǵaıyndaý kelisildi», - dep baıandady agenttik tóraǵasynyń orynbasary Azamat Jolmanov.
Taǵy bir jańashyldyq – memlekettik qyzmetshilerdi baǵalaý júıesi ózgerdi. Máselen, qatarynan eki ret tómen baǵa alǵan jumyskerdiń laýazymy tómendeıdi nemese jumystan shyǵarylady. Al 4 ret jaqsy nátıje kórsetkenderi joǵarylaıdy.
Sonymen qatar, baspasóz týry kezinde BAQ ókilderine memlekettik qyzmetke irikteýdi onlaın júrgizýge baǵyttalǵan «E-qyzmet» syrtqy portalynyń jumysy kórsetildi. Qatysýshylar proktorıng júıesiniń qalaı jumys isteıtinin jáne talapqa saı kelmeıtin faktilerdiń anyqtalý protsesimen tanysty.
Buǵan qosa, agenttik ókilderi Prezıdenttik jastar kadrlyq rezervine irikteýdiń birinshi kezeń qorytyndysyn jarııalady. Aıta keteıik, 1 qyrkúıekte rezervke kezekti irikteý bastaldy. Talap sáıkes, oǵan jasy 35-ten aspaǵan, joǵary bilimi jáne 5 jyl jalpy jumys tájirıbesi bar, memlekettik tildi V1 deńgeıinen tómen emes meńgergen Qazaqstan azamaty qatysa alady.
Іrikteý 6 kezeń boıynsha ótkiziledi:
- qujat qabyldaý;
- mátindik jáne sandyq aqparatpen jumys isteı qabiletin baǵalaý;
- sıtýatsııalyq tapsyrmalardy sheshý;
- quzyretterdi baǵalaý (Assessment center jáne quzyretter boıynsha suhbat);
- sarapshylyq komıssııada áńgimelesý;
- ulttyq komıssııa otyrysy.
Іrikteý qorytyndysy boıynsha 50 kandıdat rezervke alynady.
Jobanyń pkrezerv.gov.kz saıtynda qujattardy qabyldaýǵa berilgen ótinish negizinde bir aıda 30 myńnan astam adam tirkeldi. Onyń ishinde 6 404 qatysýshy «Mátindik aqparatpen jumys isteý qabiletin baǵalaý» testileýine jiberildi. Keıin birneshe kezeńnen súrinbeı ótip, «Quzyretterdi baǵalaý» satysyna 244 úmitker jetti. Endi olar 19-24 qazan aralyǵynda óz baqtaryn synap kóredi.
Baspasóz týry aıasynda osy Prezıdenttik jastar kadrlyq rezervine engen azamattarǵa arnap berilgen kabınetter tanystyryldy. Munda olar memlekettik basqarý salasyn jetildirýge qatysty óz oılaryn ortaǵa salyp, usynystaryn ázirleıdi.
«Bul biz úshin úlken múmkindik. Eger jınalys jasaý kerek bolsa, biz osy jerge kelip, óz suraqtarymyzdy aqyldasamyz. Prezıdenttik jastar kadrlyq rezervi óz tarapynan usynystar ázirlep, memlekettik organ basshysyna ony engize alady. Osyndaı qosymsha múmkindikterimiz bar», - dedi Prezıdenttik jastar kadrlyq rezerviniń ókili Bıbigúl Qurmanova.
Agenttik tóraǵasy Darhan Jazyqbaı bilikti kadrlardy daıarlaý, qyzmetshilerdiń bilimin jetildirý únemi basty nazarda ekenin atap ótti.
Onyń sózinshe, kásibı mamandar legin qalyptastyrý jolynda Memlekettik basqarý akademııasy álemdik standarttarǵa saı bilim berýde.
«Akademııa tek oqytýmen ǵana shektelmeıdi. Sonymen qatar biz memlekettik organdarǵa, onyń ishinde Prezıdent Ákimshiligine, Memlekettik qyzmet isteri agenttigine arnaıy qoldanbaly zertteý júrgizip, taldaý jazbalaryn daıyndaımyz. Akademııanyń árbir óńirde fılıaly bar. Olar tikeleı jergilikti atqarýshy organdarmen baılanysta. Bizde 11 baǵdarlama jumys isteıdi. Onyń 8-i magıstratýra bolsa, úsheýi doktorantýra. Akademııanyń baǵdarlamalary tek Qazaqstanda ǵana emes, sondaı-aq shetelderde akkredıttelgen. Jaqynda ǵana Eýropalyq akkredıtteý ortalyǵynyń ruqsatymen bizdiń 4 baǵdarlamamyz 2033 jylǵa deıin iske qosyldy», - dep jumystardyń nátıjesine toqtaldy QR Prezıdentiniń janyndaǵy Memlekettik basqarý akademııasynyń rektory Erlan Ábil.
Al, ádep máselelerine toqtalǵan agenttik tóraǵasynyń orynbasary Salaýat Múksimov jyl basynan beri 90-nan astam maman memlekettik qyzmettiń atyna kir keltirgenin aıtty.
«Bıyl 9 aıdyń qorytyndysy boıynsha ádep keńesterinde memlekettik qyzmetshilerge qatysty 300-den astam tártiptik ister qaralǵan. Onyń ishinde 92-si memlekettik qyzmetke kir keltiretin teris qylyqtar jasaǵany úshin túrli jaýapkershilikke tartyldy. Al Ádep jónindegi kodekstiń normalaryn buzǵan degen aıyppen 73 memlekettik qyzmetshi jaýapqa tartylǵan. Ár iske baılanysty ózindik tergeý júrgiziledi. Jalpy memlekettik qyzmet salasynda baqylaý júrgiziledi», - dep túıindedi Salaýat Múksimov.
