Bıyl memlekettik qyzmet salasyndaǵy zańnama qaıta qaralady
ASTANA. KAZINFORM — Óńirlik kadr rezerviniń múmkindikterin keńinen qoldanǵan jón. Bul týraly búgin Memlekettik qyzmet isteri agenttiginiń keńeıtilgen alqa otyrysynda QR Prezıdenti Keńsesiniń bastyǵy Baqytjan Sarıev málim etti.

— Memleket basshysy Qasym-Jomart Toqaev memlekettik qyzmettiń tıimdiligine erekshe mán berip otyr. Sebebi, memlekettik qyzmettiń qoǵamdaǵy róli aıryqsha. Bul salany jetildirip, jańǵyrtý — agenttiktiń basty mindeti. Osy ýaqyt ishinde atalǵan baǵytta birqatar jumys atqaryldy. Máselen, byltyr alǵash ret óńirlik kadr rezervteri jasaqtaldy, memlekettik qyzmet júıesin odan ári jetildirýge baǵyttalǵan arnaıy tujyrymdama qabyldandy, saıası qyzmetshilerge qoıylatyn biliktilik talaptary qaıta qaraldy, rotatsııalaýǵa jatatyn ákimshilik laýazymdardyń tizimi keńeıtildi. Agenttik — elimizde memlekettik qyzmet júıesin qalyptastyratyn ýákiletti mekeme. Sondyqtan sizderdiń aldaryńyzda birneshe mańyzdy mindetter tur. Birinshiden, bıyl memlekettik qyzmet salasyndaǵy zańnama túbegeıli qaıta qaralatyn bolady. Bul jumysta atqarylyp jatqan reformalar men memlekettik basqarýdyń erekshelikterin eskerý mańyzdy, — dedi B. Sarıev.

Onyń aıtýynsha, agenttik Úkimetpen, QR Prezıdentiniń Іs basqarmasymen birlesip, bıýdjettik mekemelerdiń kadr máselesine qatysty jumysyn tolyq avtomattandyrýy kerek.

— Búginde memlekettik organdarda kadrlyq úderister biryńǵaı kadrlyq aqparattyq júıesine kóship jatyr. Bul memlekettik sektordaǵy tanys-tamyr men týystyq baılanystardy joıýǵa baǵyttalǵan mańyzdy qadam. Sol sebepti agenttik avtomattandyrýdyń árbir qadamyn baqylap, Memleket basshysy tapsyrǵan bul isti sapaly oryndaýy qajet, — dedi QR Prezıdenti Keńsesiniń bastyǵy.

Sonymen qatar ol rotatsııalanatyn laýazymdardyń sanaty keńeıtilip, agenttikke qyzmetshilerdiń jekelegen laýazymdarda bolý merzimin uzartýdy kelisý ókilettigi berilgenin eske saldy. Osy rette rotatsııalaý kezinde qyzmetshilerdiń jumys tıimdiligine basa nazar aýdarý kerek.
— Memleket basshysynyń qoldaýymen Prezıdenttik jastar kadr rezervin jasaqtaý isi jalǵasyn taýyp keledi. Óıtkeni, ol óz tıimdiligin kórsetip jatyr. Búginde rezerv músheleri memlekettik qyzmet pen ulttyq kompanııalardyń jaýapty laýazymdarynda qyzmet etip otyr. Osy jylǵa josparlanǵan kezekti irikteýdi joǵary deńgeıde ótkizý qajet, — dedi ol.
Baqytjan Sarıevtiń sózine qaraǵanda, óńirlik kadr rezerviniń múmkindikterin keńinen qoldanǵan jón. Qazirgi kezde rezervke alynǵan 537 adamnyń 110-y ártúrli laýazymdarǵa taǵaıyndalǵan. Osyǵan baılanysty agenttiktiń aýmaqtyq departamentteri ákimdiktermen birlesip, pármendi sharalardy qabyldaýy qajet.

Eske salsaq, 2024 jyldyń 1 naýryzynan bastap oblystardyń, respýblıkalyq mańyzy bar qalalardyń jáne astananyń óńirlik kadr rezervterine irikteý bastalǵanyn jazǵan edik.
Jaqynda Úkimettiń keńeıtilgen otyrysynda Prezıdent Qasym-Jomart Toqaev otanshyl kadrlar basshylyq laýazymdarǵa taǵaıyndalatynyn aıtty.