Bıyl memlekettik eńbek ınspektorlary 28,4 myńnan astam jumyskerdiń quqyǵyn qorǵady

ASTANA. KAZINFORM – 1 tamyzdaǵy jaǵdaı boıynsha memlekettik eńbek ınspektorlary elimizde 239 kásiporynda 3,5 myńnan astam jumyskerge 1,3 mlrd teńge jalaqy qaryzy baryn anyqtady. Bul týraly Eńbek jáne halyqty áleýmettik qorǵaý mınıstrligi málim etti.

Túrli uıymdarda júrgizilgen tekserýler barysynda eńbek quqyǵynyń 4 myńnan astam buzylý faktisi tirkeldi. Jalaqy qaryzy men eńbek quqyǵynyń buzylýy anyqtalǵan kásiporyndardyń basshylaryna 2 287 uıǵarym berilip, 277 mln teńgeden astam aıyppul salyndy.

Qabyldanǵan sharalardyń, onyń ishinde jalaqy boıynsha bereshekti óteýdiń qatań kesteleri men merzimderin belgileýdiń nátıjesinde 3,4 myńnan astam jumyskerdiń quqyǵy qorǵalyp, olarǵa 1,1 mlrd teńge tólendi.

Mınıstrliktiń dereginshe, eńbek zańnamasynyń saqtalýyna memlekettik baqylaý erekshe nazarda. Bıyl 1 tamyzdaǵy jaǵdaı boıynsha memlekettik eńbek ınspektorlary 3 514 tekserý júrgizip, 4 132 buzýshylyqty anyqtady. Onyń ishinde eńbek salasynda – 3 465, eńbek qaýipsizdigi jáne eńbekti qorǵaý boıynsha – 648, halyqty jumyspen qamtý boıynsha – 19 derek tirkelgen.

- Jalpy qabyldanǵan sharalardyń nátıjesinde 25 myń jumyskerdiń eńbek quqyǵy qorǵaldy, - dep jazdy vedomstvodan.

Aıta keteıik, Jetisý oblysynda 160-qa jýyq jumysshynyń eńbek quqyǵy qorǵaldy.