Bıyl memleketten zańsyz shyǵarylǵan aktıvterdiń 40 mlrd teńgesi qaıtaryldy
ASTANA.KAZINFORM — Bas Prokýror Berik Asylovtyń tóraǵalyǵymen Bas prokýratýranyń 2026 jyldyń birinshi jartyjyldyǵyndaǵy qyzmet qorytyndylaryna arnalǵan keńeıtilgen alqa otyrysy ótti.
Áleýmettik baǵdarlamalardyń tabysty iske asyrylýyn qamtamasyz etý maqsatynda prokýrorlardyń kúsh-jigeri quqyq buzýshylyqtardyń jolyn kesýge jáne memleketke keltirilgen zalaldy óteýge baǵyttaldy.
Prokýrorlardyń qabyldaǵan sharalarynyń nátıjesinde memleket paıdasyna 147 mlrd teńge óndirildi (múlik, salyqtar, ekologııaǵa keltirilgen zalal jáne basqa da tólemder).
Prezıdenttiń memlekettik basqarý tıimdiligin arttyrý jónindegi tapsyrmasyn oryndaý sheńberinde prokýrorlar 342 mlrd teńge kólemindegi memlekettik qarajattyń zań buzýshylyqtarmen jumsalýyna jol bermedi. Bul rette shyǵystardy negizsiz josparlaýǵa, básekelestikti shekteýge, artyq taýarlardy, jumystar men kórsetiletin qyzmetterdi satyp alýǵa jol bermeýge erekshe nazar aýdarylýda.
Aktıvterdi qaıtarý jáne olardy zańdy ekonomıkalyq aınalymǵa tartý jónindegi júıeli jumys jalǵastyryldy.
— Bıyl memleketten zańsyz shyǵarylǵan aktıvterdiń 40 mlrd teńgesi qaıtaryldy (onyń ishinde 37,7 mlrd teńge aqshalaı qarajat, 2,3 mlrd teńge kólemindegi múlik).
Arnaýly memlekettik qordyń qarajaty esebinen 39 áleýmettik nysan paıdalanýǵa berildi (olardyń qatarynda Aqtaý qalasyndaǵy jedel medıtsınalyq járdem stantsııasy, Shymkent qalasyndaǵy stýdentter jataqhanasy, Astana qalasyndaǵy Qajymuqan Muńaıtpasov atyndaǵy fýtbol stadıony, Balqash qalasy áýejaıyn rekonstrýktsııalaý jáne basqa da nysandar bar), — delingen habarlamada.
Zań talaptaryn saqtaıtyn bıznesti keshendi prokýrorlyq qorǵaý júıesi qalyptastyryldy.
Investorlardyń quqyqtaryn qorǵaý jónindegi Memleket basshysynyń tapsyrmasy erekshe baqylaýda.
Prezıdent Jarlyǵymen qurylǵan Investorlardyń quqyqtaryn qorǵaý jónindegi komıtet óz ókilettikterin iske asyrýǵa kiristi.
Negizgi nazar den qoıý sharalarynan júıeli ári proaktıvti jumysqa kóshýge, ıaǵnı problemalardyń túpki sebepterin anyqtap, olardy joıýǵa aýdaryldy.
— Qazirgi ýaqytta prokýrorlardyń súıemeldeýinde 3 myńnan astam ınvestıtsııalyq joba bar. Olardy iske asyrý jańa ekonomıkalyq ósý núktelerin qalyptastyrýǵa, salyq bazasyn keńeıtýge, jumyspen qamtýdy arttyrýǵa jáne áleýmettik turaqtylyqty nyǵaıtýǵa múmkindik beredi. Atalǵan jobalardy júzege asyrý aıasynda 600 myńnan astam jańa jumys ornyn ashý josparlanyp otyr, delingen Bas prokýratýra habarlamasynda.
Investıtsııalardy tartý, aktıvterdi qaıtarý jáne qylmyskerlerdi ekstradıtsııalaý máselelerin qosa alǵanda, halyqaralyq yntymaqtastyqty damytý jumystary jalǵasyp jatyr.
Bas prokýratýranyń qorjynynda 39 ıýrısdıktsııamen jasalǵan 92 ekijaqty shart bar. Olardyń qatarynda Ulybrıtanııa, Gonkong, Úndistan, Ispanııa, Italııa, AQSh, Monako Knıazdigi, Frantsııa, Makao jáne basqa memleketter men aýmaqtar bar.
— Qazaqstanǵa 27 adam ekstradıtsııalandy (Grýzııa, Qyrǵyzstan, Birikken Arab Ámirlikteri, Reseı, Túrkııa, Chernogorııa jáne basqa elderden), al shet memleketterge 70 adam berildi (Armenııa, Belarýs, Qyrǵyzstan, Mońǵolııa, Polsha jáne basqa elderge), — delingen habarlama.
Alqa otyrysynyń qorytyndysy boıynsha Bas Prokýror qadaǵalaý organynyń aldaǵy jumysynyń negizgi baǵyttaryn aıqyndady. Olar júıeli tsıfrlyq transformatsııa qaǵıdattaryna, quqyq buzýshylyqtarǵa jedel den qoıýǵa jáne memlekettiń barlyq qyzmet salalarynda zańdylyq rejımin dáıekti túrde nyǵaıtýǵa negizdeletin bolady.
Aıta ketelik esirtkiden túsken 2,6 mlrd teńge zańsyz kiriske tosqaýyl qoıylǵany týraly jazǵan edik.
