Bıyl memleketke 716 mlrd teńge qaıtaryldy - Bas prokýror

ASTANA. KAZINFORM – Investıtsııalyq jobalardy qoldaý barysynda 822 ınvestorǵa kómek kórsetildi. 2023 jyldan beri bul kórsetkish 1 522-ge jetti. 

Bas prokýror Berik Asylovtyń dereginshe, olardyń jalpy ınvestıtsııa kólemi 8,3 trln teńgeni qurap, ondaǵan myń jumys ornyn qurýǵa jáne saqtaýǵa yqpal etti.

Aǵymdaǵy jyldyń basynan beri prokýratýra organdarynyń mobıldi toptaryna 800-den astam kásipker júgingen, olardyń árbir tórtinshi faktisi rastalǵan. Shaǵymdardyń basym bóligi tekserý júrgizýdiń zańdylyǵyna, shekteý sharalaryn qoldanýǵa jáne adamdardy ákimshilik jaýaptylyqqa tartý máselelerine qatysty boldy. Nátıjesinde 86 qadaǵalaý aktisi engizilgen.

«Atameken» UKP-men ekijaqty kelisim aıasynda prokýratýra organdary bıznestiń júıeli problemalaryn sheshýge belsendi qatysady. Investorlardy qorǵaý tetikteriniń biri – bıyl zańnamamen bekitilgen «prokýrorlyq súzgi». Bul qural ruqsattardy berý tártibin jeńildetip, memlekettik organdardyń sheshim qabyldaý protsesinde ashyqtyqty qamtamasyz etti», – dedi Bas prokýror.

Onyń sózinshe, Aktıvterdi qaıtarý komıteti 2025 jyly 354 mlrd teńgeden astam qarajatty memleketke qaıtarǵan. Qarjy 400-den astam áleýmettik nysan qurylysyna baǵyttalyp, onyń ishinde shalǵaı eldi mekenderde 333 nysannyń qurylysy bastaldy. Qazirdiń ózinde densaýlyq saqtaý jáne sport salasyndaǵy 33 nysan paıdalanýǵa berildi.

«Bıýdjet qarajatyn jumsaý jáne memlekettik satyp alý salasynda júrgizilgen tekserýler nátıjesinde memleket kirisine 5,7 mlrd teńge óndirip alyndy, 259 mlrd teńgege 641 satyp alý joıyldy, 1 519 adam jaýapkershilikke tartyldy. Jalpy, prokýrorlyq sharalardyń nátıjesinde bıýdjetke 716 mlrd teńge qaıtaryldy. Budan bólek, memlekettik satyp alý salasynda 109 mlrd teńgeniń yqtımal shyǵyndarynyń aldyn aldyq», – dedi Berik Asylov.

Aıta keteıik, qaıtarylǵan aktıvter esebinen Qostanaı oblysyndaǵy aýylǵa aýyz sý tartylyp jatyr.