Bıyl mektepterdiń 80%-na deıin joǵary jyldamdyqty ınternetpen qamtylady – mınıstrlik

ASTANA. KAZINFORM - Memleket basshysynyń tapsyrmasy boıynsha orta bilim berý uıymdaryn joǵary jyldamdyqtaǵy jáne turaqty ınternetpen qamtamasyz etý boıynsha jumystar júrgizilýde. Bıyl ınternetpen qamtý 65%-dan 80%-ǵa deıin ulǵaıtylady.

Bul týraly QR Oqý-aǵartý mınıstrliginiń baspasóz qyzmeti habarlady.

Baspasóz qyzmetiniń málimetterine qaraǵanda, bul shara oqytý úshin qolaıly jaǵdaılar jasaýǵa jáne bilim berý sapasyn jaqsartýǵa baǵyttalǵan.

«Mektepterde joǵary jyldamdyqy ınternetti qamtamasyz etýdiń birneshe mańyzdy artyqshylyqtary bar. Birinshiden, bul oqýshylar men muǵalimderge úlken kólemdegi aqparat pen bilim berý resýrstaryna qol jetkizýge múmkindik beredi, oqý protsesi men oı-óristi keńeıtýge yqpal etedi. Ekinshiden, joǵary jyldamdyqtaǵy ınternet túrli onlaın-platformalar arqyly basqa mekteptermen jáne bilim berý mekemelerimen ózara is-qımyl jasaý múmkindigin qamtamasyz etedi, kommýnıkatsııany damytýǵa jáne tájirıbe almasýǵa yqpal etedi», - dep atap ótti tsıfrlandyrý departamenti dırektorynyń mindetin atqarýshy Maıra Maralbaeva.

Aıta keteıik, mınıstrlik qoldanystaǵy ınfraqurylymdy jańǵyrtý, jelilik qamtýdy keńeıtý, derekterdi berý jyldamdyǵyn arttyrý jáne shalǵaı, turǵyny az aýdandarda ınternettiń qoljetimdiligin qamtamasyz etý sııaqty túrli sharalardy josparlaýda.

Osyǵan deıin mınıstrlik 5 425 mekteptiń joǵary jyldamdyqty ınternetpen qamtylǵanyn málimdegen edi.