Bıyl mektep túlekterine qandaı shekteý qoıylady
ASTANA. KAZINFORM — Bıyl mektep bitirý keshteri belgilengen ortaq tártippen ótedi. Bul týraly Astana qalasy Bilim basqarmasy basshysynyń orynbasary Marjan Qaıyrbaeva qalalyq Kommýnıkatsııalar qyzmetinde ótken brıfıngte málimdedi.
Onyń aıtýynsha, Oqý-aǵartý mınıstrliginiń talabyna sáıkes, mektep bitirý keshteri men attestat tabystaý rásimderi tek mektepte uıymdastyrylýy tıis. Osyǵan baılanysty meıramhanalarda, kafelerde jáne ózge de oıyn-saýyq oryndarynda saltanatty shara ótkizýge ruqsat berilmeıdi.
— Bul talaptar balalardyń qaýipsizdigin qamtamasyz etýge baǵyttalǵan. Sonymen birge quqyq buzýshylyq pen jazataıym jaǵdaılardyń aldyn alyp, ata-analarǵa túsetin artyq shyǵyndy azaıtý kózdelgen, — dedi ol.
Sondaı-aq bitirý keshteri kezinde dastarqan jaıýǵa, kólik sherýin uıymdastyrýǵa, anımatorlar men merekelik agenttikterdi tartýǵa tyıym salynady. Muǵalimder men mektep ákimshiligine syılyq alý úshin ata-analardan aqsha jınaýǵa da jol berilmeıdi.
Bilim basqarmasy áleýmettik teńdikti saqtaý jáne oqýshylar arasynda artyq básekelestikke jol bermeý úshin túlekterge mektep úlgisindegi kıim kııýdi usyndy.
Marjan Qaıyrbaeva elordada mektep bitirý sharalary kezinde oqýshylardyń qaýipsizdigine erekshe kóńil bólinetinin aıtty.
— Quqyq buzýshylyqtar men jazataıym jaǵdaılardyń aldyn alý úshin Bilim basqarmasy Polıtsııa departamentimen jáne aýdan ákimdikterimen birlesip, bitirý rásimderi ótetin kúnderi táýlik boıy reıdtik sharalar uıymdastyrady, — dedi ol.
Buǵan deıin Oqý-aǵartý mınıstrligine mektepterde smartfondardy paıdalanýǵa tolyq tyıym salý quzyreti beriletinin jazǵan edik.
