Bıyl mektep bitirý keshterin meıramhanada ótkizýge ruqsat berile me
ASTANA. KAZINFORM — Mektep bitirý keshterin ótkizýge jańa shekteýler engizildi, dep habarlaıdy Oqý-aǵartý mınıstrliginiń baspasóz qyzmeti.
Oqý-aǵartý jáne Іshki ister mınıstrlikteri jergilikti atqarýshy organdarymen birlesip orta bilim berý uıymdarynda bitirý keshterin ótkizýge baılanysty talaptardy naqtylady. Osy maqsatta birlesken buıryq qabyldanatyn bolady.
Qabyldanǵan sharalar bilim alýshylardyń qaýipsizdigin qamtamasyz etýdi, olardyń quqyqtaryn qorǵaýdy jáne quqyq buzýshylyqtardyń aldyn alýdy qarastyrady.
— Attestattardy tabystaý rásimi tek bilim berý uıymdarynyń ǵımarattarynda uıymdastyrylady. Bilim alýshylardan, olardyń ata-analarynan nemese zańdy ókilderinen qarajat jáne ózge de materıaldyq qundylyqtardy jınaýǵa qatań tyıym salynady. Belgilengen talaptarǵa sáıkes, bitirý keshterin bilim berý uıymdarynan tys jerlerde uıymdastyrýǵa jol berilmeıdi, — delingen habarlamada.
Jergilikti atqarýshy organdarǵa qarjylyq shyǵyndardy talap etpeıtin tárbıelik jáne mádenı-aǵartýshylyq is-sharalardy uıymdastyrý jáne túsindirý jumystaryn júrgizý tapsyryldy.
Іshki ister organdary tarapynan quqyq buzýshylyqtardyń aldyn alý, qoǵamdyq tártipti saqtaý jáne bilim alýshylardyń qaýipsizdigin qamtamasyz etý boıynsha sharalar tapsyryldy.
Osyǵan deıin mamandandyrylǵan kúzet mektepterge qyzmet kórsetýden bas tartyp otyrǵanyn jazǵanbyz.
