Bıyl magıstratýraǵa 23 065 talapker tústi — Ǵylym jáne joǵary bilim mınıstrligi
ASTANA. KAZINFORM — Mınıstrlik magıstratýra men doktorantýraǵa qabyldaý qabyldaý naýqanynyń nátıjelerin jarııalady.
Vedomstvonyń málimetinshe, bıyl magıstratýra boıynsha keshendi testileýge 51 myńnan asa ótinim túsken. Bul — ótken jylǵa qaraǵanda 9,5 myńǵa artyq. Testileýge qatysqan 47 798 úmitkerdiń jartysyna jýyǵy, naqtyraq aıtqanda 23 065 talapker, shekti baldy eńserip, bilimge degen tabandylyǵyn dáleldedi.
Ortasha kórsetkish te joǵarylady — KT-nyń ortasha baly 72,9-ǵa jetip otyr. Bul qazaqstandyq jastardyń daıyndyq deńgeıi men yntasynyń artyp kele jatqanyn kórsetedi.
Memlekettik granttar da aıtarlyqtaı úlestirildi: magıstratýraǵa 13 554 grant bólinip, onyń ishinde ınjenerlik-tehnıkalyq baǵyttar (3 338), pedagogıkalyq ǵylymdar (3 225), aqparattyq-kommýnıkatsııalyq tehnologııalar (1 315) jáne jaratylystaný ǵylymdary (1 268) basymdyqqa ıe boldy.
Bıyl doktorantýraǵa suranys deńgeıi edáýir joǵary boldy. Qabyldaý synaqtaryna 4 307 adam qatysyp, onyń 3 146-sy ǵylym jolynda ilgeri qadam jasaýǵa múmkindik aldy.
— 2025-2026 oqý jylyna doktorantýraǵa 2 919 memlekettik grant bólindi. Onyń ishinde pedagogıkalyq ǵylymdarǵa — 486, ınjenerlik jáne qurylys salalaryna — 615, aqparattyq-kommýnıkatsııalyq tehnologııalarǵa — 161 grant qarastyrylǵan, — delingen habarlamada.
Aıta keterligi, qazirgi tańda doktorantýraǵa qabyldaý tolyqtaı joǵary oqý oryndarynyń quzyretinde. Bul — ýnıversıtetterdiń akademııalyq erkindigi men derbestigin arttyratyn mańyzdy qadam.
Otandyq ǵylymdy halyqaralyq deńgeıge kóterý úshin búgingi talapkerlerdiń moınynda úlken mindet tur. Olar — erteńgi ǵylymı jańalyqtyń ıeleri, ulttyq múddeni álemdik órkenıetke tanytatyn býyn.
— Bul kórsetkishter — Qazaqstannyń bilim berý júıesiniń qarqyndy damýynyń aıqyn dáleli. Ǵylym jolyna túsken árbir jas izdenýshi — elimizdiń bolashaǵyna qosylǵan zor úles, — dep jazdy vedomstvodan.
Eske sala keteıik, buǵan deıin mınıstr Saıasat Nurbek elimizde ǵylymdy qarjylandyrý 3,3 esege óskenin málimdegen edi.