Bıyl kúzde kıik aýlaýǵa qaıta ruqsat beriledi - vıtse-mınıstr
SAMARQAN. KAZINFORM – Bıyl kúzde Qazaqstanda kıik atýǵa qaıta ruqsat etiledi. Bul týraly Samarqanda ótip jatqan únemi qonys aýdaryp tirshilik etetin jabaıy janýar túrlerin saqtaý konventsııasynyń kezekti otyrysynda (COP 14) QR Ekologııa jáne tabıǵı resýrstar vıtse-mınıstri Nurken Shárbıev málim etti, dep habarlaıdy Kazinform. agenttiginiń Ózbekstandaǵy menshikti tilshisi.
«Naqty esep joq. Tek tabylǵan, alynǵan múıizderdiń sany bar. Osy jyly 4 myńdaı kıik múıizi alyndy. Endi ony ekige bólseńizder (shamamen 2 myń bas kıik – avt.), brakonerler atqan aqbóken sany shyǵady. Bul tek quzyrly organdar tapqan, ustaǵan faktiler negizinde anyqtalǵan mólsher», - dedi Nurken Shárbıev Kazinform tilshisiniń saýalyna jaýap bere otyryp.
Aıta keteıik, 10 aqpannan bastap Qazaqstanda kıik atýǵa tyıym salyndy. Alaıda, Ekologııa jáne tabıǵı resýrstar vıtse-mınıstri bıyl qyrkúıek pen qarasha aralyǵynda aqbókendi aýlaýǵa qaıta ruqsat beriletinin málim etti.
«Byltyrdan bastap ruqsat berilgen aralyqta 41 myń bas aýlandy. Janýardyń sanyn retteý jónindegi bıologııalyq negizdemege saı, 336 myń bas josparlanǵan edi. Degenmen aýa raıy men et óńdeý kásiporyndarynyń shekteýli qýatyna baılanysty shamamen 2 aıdyń ishinde 41 myń kıik aýlandy. Bıyl da bul jumys jalǵasady. ıAǵnı, 1 qyrkúıek pen 30 qarasha aralyǵynda aqbókendi aýlaýǵa ruqsat etiledi. Onyń kólemi bıologııalyq negizdemege saı anyqtalady. Eger kıik sanyn rettep otyrmasaq, aýyl sharýashylyǵy jerlerine, tıisinshe fermerlerge shyǵyn keledi», - dep túsindirdi Nurken Shárbıev.
Toqtala ketsek, Samarqanda ótip jatqan konferentsııa barysynda kıikterdiń mıgratsııasy máselesi de talqylandy. Búginde Qazaqstannyń Ózbekstan jáne Túrikmenstanmen aradaǵy shekarasynda 600 gektar aýmaq qarastyrylǵan. Ol jerdegi qorshaýlar alynǵan, tıisinshe elimizdi mekendeıtin aqbókender kúzden bastap atalǵan memleketterge kóshedi.
Ózbekstandyq sarapshylardyń aıtýynsha, sońǵy kezderi kıik mıgratsııasy kúrt azaıǵan. Óıtkeni, janýarlardyń únemi qonys aýdaratyn aýmaqtarynda temirjol salynypty.
