Bıyl kúzde qazaq tilin tegin úıretetin jasandy zeıin qosymshasy qoldanysqa beriledi

ASTANA. KAZINFORM – Jańa oqýy jylynda QazaqLingo atty qazaq tilin tegin úıretetin úsh deńgeıli jasandy zeıin qosymshasy qoldanysqa beriledi. Jobanyń avtory – Halyqaralyq «Qazaq tili qoǵamy».

- Bul – bizdiń óz kúshimizben jasalyp jatqan, til úırenýge arnalǵan qosymsha. Onyń mazmundyq negizi – ózimiz qurastyrǵan, «Úırenýge ońaı qazaq tili» dep atalatyn óz betinshe til oqýǵa arnalǵan úsh deńgeıli ádistemelik qural. Aldyńǵy jyly ІT ýnıversıtet stýdentteri arasynda baıqaý jarııalap, solardyń kúshimen jańa aıtyp ótken mazmun negizinde bir nusqasyn jasadyq. Ony da barynsha tıimdi, barynsha únemdi jolmen iske asyrýǵa tyrystyq. Stýdentter baryn saldy. Degenmen de tájirıbe bolmaǵannan keıin áli de jetildirýdi talap etetin tustary bar. Sondyqtan ony qazir synaq túrinde ortaǵa saldyq. Adamdar qoldanyp kórip, pikirin aıtyp jatyr. Dızaın, múmkindikter turǵysynan jetildiretin tustaryn kórip, sony jyldyń ortasyna deıin aıaqtap, jańa oqý jylynda kópshilikke tanystyrmaqshymyz, - dedi osy qoǵamnyń prezıdenti Raýan Kenjehanuly Kazinform agenttigine bergen suhbatynda.

Memlekettik tildi úıden shyqpaı-aq, tegin úırenemin deýshiler qosymshany tegin júktep, tegin paıdalana alady.

- Qosymsha tegin jumys isteıdi. Sonyń negizinde qosymshany qoldanýshylardyń qaýymdastyǵyn da qurǵymyz keledi. Keıde tegin dúnıeniń qadirine jete almaı qalamyz, sondyqtan kelgen adamdardy turaqty paıdalanýshyǵa aınaldyrýdyń amaldaryn qarastyryp jatyrmyz. Jalpy ol qosymsha qoldanýshynyń talabyna, tehnologııalardyń damýyna baılanysty jetildirile beredi, - dedi ol.

Aıtýynsha, áýelde bul jobany Duolingo platformasy arqyly iske asyrý jospary bolǵan.

- Shynyn aıtqanda, áýeli biz búkil álem qoldanatyn, kóp tildi oqytatyn osyndaı platformalardy qazaqshalaǵymyz kelgen. Duolingo degen platformany estýińiz bar shyǵar. Іri-iri, aǵylshyn, ıspan, qytaı sııaqty qyryq shaqty tildi oqytý ádistemeleri júktelgen. Qazir eń keń qoldanylatyn til úırený platformasy osy. Olarmen birneshe ret baılanys ornatýǵa qadam jasap kórdik. Amerıkada júrgen baýyrlarymyzdy da qostyq. Biraq ázirge ol platforma ıeleriniń qazaq tiline qyzyǵýshylyǵy joq. Basqa da qyzmetterdi zerttep, sóılesip jatyrmyz. Ázirshe óz qosymshamyzdy damyta beremiz. Bul da til úırenýshi ortaǵa jaqsy kómek bolady dep senemiz. Óıtkeni ádistemesi ózimizge unaıdy, - dedi «Qazaq tili» qoǵamynyń prezıdenti.

Suhbattyq tolyq nusqasyn myna siltemeden oqýǵa bolady.