Bıyl kúrish pen maqtanyń egis alqaptary 41 myń gektarǵa qysqartylmaq

ASTANA. KAZINFORM — Bıyl elimizde kúrish pen maqtanyń egis alqaptary keminde 41 myń gektarǵa qysqartylady.

Bul týraly Úkimet otyrysynda QR Sý resýrstary jáne ırrıgatsııa mınıstri Nurjan Nurjigitov aıtty.

— Ylǵaldy talap etetin daqyldardy qysqartý Agroónerkásiptik keshendi damytýdyń 2030 jylǵa deıingi tujyrymdamasynyń basymdyqtaryna tikeleı sáıkes keledi, soǵan sáıkes aýyl sharýashylyǵy daqyldarynyń qurylymyn ártaraptandyrý kózdelgen. Indıkatıvtik kórsetkishterge sáıkes, 2025 jylǵa qaraı kúrish pen maqta egis alqaptary keminde 41 myń gektarǵa qysqartylýy tıis, — dedi ol óz baıandamasynda.

Sondaı-aq mınıstr maqta men kúrish alqaptary naqty qansha gektarǵa qysqartylatynyn atap kórsetti.

— Kúrish boıynsha — 10 myń gektarǵa, naqtyraq aıtqanda: Qyzylorda oblysynda — 89 myń gektardan 80,9 myń gektarǵa deıin, Túrkistan oblysynda — 3,2 myńnan 2,8 myń gektarǵa deıin, Almaty jáne Jetisý oblystarynda — 8 myńnan 6,5 myń gektarǵa deıin. Sondaı-aq Túrkistan oblysynda dástúrli ádispen sýarylatyn maqta alqaptaryn 31 myń gektarǵa qysqartý josparlanýda, — dedi Nurjan Nurjigitov.

Osyǵan deıin elimizde egis alqabynyń jalpy kólemi 23,7 mln gektarǵa jetkenin jazǵanbyz.